Саясат Нұрбек Аризона университетімен екі дипломды бағдарлама студенттері үшін жаңа оқу жылының ашылу салтанатына қатысты

ҚР Ғылым және жоғары білім министрі Саясат Нұрбек пен Аризона университеті өкілдерінің қос диплом бағдарламаларының студенттері үшін жаңа оқу жылының ашылу салтанатына қатысуы жақсы дәстүрге айналды. Бірлескен білім беру бағдарламалары бойынша студенттер үшінші жыл қатарынан оқып жатыр.

Іс-шара барысында Саясат Нұрбек Қазақстандағы жоғары білім беруді дамыту стратегиясы, шетелдік университеттермен және технологиялық трансұлттық корпорациялармен әріптестік перспективалары, сондай-ақ Coursera сияқты онлайн-оқыту платформалары туралы айтты. Ол академиялық адалдық, жеке жауапкершілік және студенттерге өзін-өзі тәрбиелеу қажеттілігі мәселелерін қозғады. Мотивация ретінде министр бірнеше кітаптар ұсынып, жеке тәжірибесімен бөлісті.

«АҚШ оқытушыларының арқасында сіздерге үлкен мүмкіндіктер ашылуда. Білім алу мүмкіндігін барынша пайдаланыңыздар, ой-өрісті кеңейтіп, жобаларға қатысып, жаңа нәрселерді білуге ұмтылыңыздар. Ал министрлік сіздерге әрқашан қолдау көрсетуге дайын», - деді Саясат Нұрбек студенттерге.

Студенттер министрге Қазақстанда шетелдік жоғары оқу орындарының филиалдарын, кибер-университеттерді, онлайн-оқытуды, сондай-ақ инклюзивті білім беру саласында педагогтарды даярлау үшін білім беру модельдерін ашуға қатысты сұрақтарын қойды. Биотехнология бойынша қос диплом бағдарламасының үшінші курс студенті Амир Ағзамов оны ғылыми зерттеулерге итермелеген Сингапур ұлттық университетінде «NUS Amgen Scholars Program 2024» бағдарламасы бойынша жазғы тағылымдамаға қатысу тәжірибесімен бөлісті.

Студенттер Қазақстанда жүзеге асырылып жатқан ауқымды ғылыми және академиялық жобалар оларды шабыттандырып, жаңа мүмкіндіктер ашатынын атап өтті.

Ақпарат көзі: Қазақстан Республикасы Ғылым және жоғары білім министрлігі