2023 жылы өткізілген Қаржы секторын бағалау бағдарламасының (FSAP) қорытындылары бойынша Агенттікке пруденциялық нормативтерді шоғырландырылған деңгейде Базель стандарттарына сәйкестендіру және тәуекелдерді басқару жүйелеріне қойылатын талаптарды банк конгломераттарына қатысты қолдану бойынша шоғырландырылған қадағалауды дамыту жөнінде ұсынымдар берілді.

Осы ұсынымдарды іске асыру үшін 2023-2024 жылдар аралығындағы кезеңде ХВҚ техникалық көмегінің шеңберінде Агенттік пруденциялық нормативтерді шоғырландырылған деңгейде енгізу бойынша нормативтік-құқықтық актілердің (НҚА), сондай-ақ Банк конгломераттары үшін тәуекелдерді басқару, корпоративтік басқару және ішкі бақылау жүйесін қалыптастыру қағидаларының жобаларын әзірледі. 

Банк конгломераттары үшін тәуекелдерді басқару және ішкі бақылау жүйесін қалыптастыру қағидалары корпоративтік басқаруға, тәуекелдерді, капитал мен өтімділікті басқаруға, ішкі бақылауға және банк конгломератының аудитіне қойылатын талаптарды көздейді.    

Конгломераттың капиталына қойылатын пруденциялық талаптар инвестицияларды шегергенде конгломераттың шоғырландырылған капиталы негізінде капиталдың жеткіліктілік коэффициентінің есебін көздейді. Банк конгломераты капиталының жеткіліктілік коэффициенті 1-ден асатын деңгейде белгіленеді, сондай-ақ капиталдағы өзара қатысу (қосарланған есеп) алып тасталады.    

Бұл НҚА-ны 2024 жылғы желтоқсанда қабылдау, 2025 жылы күшіне енгізу жоспарланып отыр. 

Сыртқы коммуникациялар Басқармасы

+7 (727) 237 10 89

press@finreg.kz

Ақпарат көзі: Қазақстан Республикасының Қаржы нарығын реттеу және дамыту агенттігі