ҚР Қорғаныс министрлігі Орталық архиві мен Астана қаласы мемлекеттік архивінің ынтымақтастығы туралы Меморандумға мекеме басшылары подполковник Талғат Құлжанбеков пен Жангелді Бимолдин қол қойды.

Тараптар еліміздің жетістіктерін дәріптеу мен ғылыми саладағы өзара іс-қимыл мақсатында мұрағат қорларын тиімді пайдалану туралы уағдаласты. Сонымен қатар архивтер бірлескен ғылыми-практикалық зерттеулерді жүзеге асыруға жәрдемдесуге ниетті.

– Біз бір-бірімізге жан-жақты көмек көрсетуге, сондай-ақ консультациялық, ақпараттық-талдамалық және әдіснамалық қолдау көрсетуге дайынбыз. Архив қызметкерлері ғылыми-әдістемелік әдебиеттер мен мақалалар алмасады, сондай-ақ архив құжаттарының бірлескен жарияланымдарын дайындап, ғылыми-зерттеу қызметін жүргізеді. Келісілген тақырыптар бойынша деректі көрмелер ұйымдастырады, – деп түсіндірді Қорғаныс министрлігі орталық архивінің бастығы подполковник Талғат Құлжанбеков.

Меморандум сонымен қатар ақпарат алмасуды, семинарлар, конференциялар, тақырыптық пікірталастар, симпозиумдар, көрмелер мен құжаттарды қалпына келтіру бойынша шеберлік сыныптарын өткізуді көздейді. Әзірге үш жылға жасалған құжат келесі кезеңде автоматты түрде ұзартылып отырады.

Ақпарат көзі: Министерство обороны Республики Казахстан