Ақтөбе қаласының тұрғыны Мұрат Жұмаханов - көктемгі су тасқынында зардап шеккендердің бірі.

Қарғын судан бүкіл мүлкі жарамсыз болып қалған, үйі де апатты деп танылыпты. 2 айдан астам уақыт бойы отбасымен эвакуациялық пункт, уақытша орналасу орталықтарын паналаған.

Мұрат Жұмахановтың жаңа пәтері - үш бөлмелі. Ол бұл үйде 7 адам болып тұрамыз дейді.

Ақтөбелік тұрғын қуанышын жасырмай, өзі секілді тасқыннан жапа шеккен жерлестеріне ниеттестігін білдіріп, қиын сәттерде қол ұшын созғандарға алғысын айтты.

«Біз Строительный көшесінде бау-бақша ұжымында тұрдық. Кенеттен су келіп, үйіміз суға кетті. Су тасқынынан енді заттарымыз да, мүлкіміз де бүлінді. Міне, нәтижесінде Үкіметімізге рахмет. Далаға қалдырмай, сол күні түнде апарып, қауіпсіз жерге орналастырды. Екі ай бойы тамағамыз тоқ, бәрі жақсы болды.  Ал, мінекей, үйіміз де берілді, құжаттардың бәрін қолымызда. Қазір үйімізге кіріп қараймыз. Отбасымыздың да, ағайын-туысымыздың да көңілдері көтеріліп, бір марқайып қалдық. Аман болайық», - деді Мұрат Жұмаханов.

Ақпарат көзі: ГУ «Акимат Актюбинской области»