Қарағанды қаласындағы Оқушылар сарайында әр жылғы түлектердің, Қарулы күштер ардагерлерінің, әскери қызметшілер мен республикалық мектеп оқытушыларының қатысуымен мерекелік іс-шара өтті.

Мектеп түлегі Құрлық әскерлерінің бас қолбасшысы генерал-майор Асан Жүсіпов құттықтау сөз сөйледі.

– Әр адамның тағдырына әсер ететін адамдар, оқиғалар, құбылыстар болады. Менің әскери мансабымдағы осындай маңызды кезең Қарағанды республикалық мамандандырылған мектебінде өтті. Бүгін осындай оқу ұжымындағы үздік дәстүрді қалыптастырудың бастауында тұрған барлық адамдарға алғыс білдіру үшін осында жиналдық, – деді ол.

Құрлық әскерлерінің бас қолбасшысы оқу орнының қалыптасуы мен дамуына үлес қосқан әскери қызметшілер мен ардагерлерді медальдармен, грамоталармен және алғыс хаттармен марапаттады, сондай-ақ мектепке спорттық мүліктер алуға сертификат табыс етті.

Мерейтой құрметіне мектеп туралы «Жас ұлан» – ұрпақтар сабақтастығы» кітабы жарық көрді. Кітапты құрастырған Қазақстан Журналистер одағы сыйлығының лауреаты, Қарулы күштердің ардагері Марат Жүніс-Бек. Басылымда қысқаша өмірбаяндық мәліметтер, фотосуреттер, ардагерлердің естеліктері, олардың марапаттары мен жетістіктері туралы ақпарат берілген.

Қырық жыл ішінде мектепті бес мыңнан астам түлек бітіріп шықты. Олардың қатарында Қарулы күштер Бас штабы бастығының орынбасары генерал-майор Сәкен Жүсіпов, Құрлық әскерлерінің бас қолбасшысы генерал-майор Асан Жүсіпов, Ауған соғысының ардагерлері, Черноболь апаты салдарын жоюшылар және елдің түрлі күштік құрылымдарының әскери қызметшілері бар.

Ресми бөлімнен соң мектеп түлектері плацта сап түзеп жүріп өтіп, партаға отырды. Курсант кезіндегі естеліктерімен бөлісті.

2025 жылы «Жас ұлан» Қарағанды мектебі әскери колледж болып қайта құрылатынын айта кету керек.

Ақпарат көзі: Министерство обороны Республики Казахстан