Теміржол станциясында су тасқынына қарсы жұмыстарға жұмылған жауынгерлерді әскери оркестр қарсы алды, ал әскери бөлімде оларды әріптестері мен туыстары асыға күтті. 

Атырау облысында төтенше жағдай режимі осы жылдың 7 сәуірінде енгізілді. Бірден өңір басшылығынан су тасқынынан зардап шеккен аудандарға көмек көрсету үшін күш-құралдарды жұмылдыру туралы өтініш келіп түсті. 

Қысқа мерзімде Қарулы күштер Құрлық әскерлері бас қолбасшысының өкімімен Тараз, Гвардейск және Шымкент гарнизондары бөлімшелерінің құрамынан апат аймағына мың әскери қызметші жөнелтілді.

– Атырау облысына келгеннен кейін бізді Индер ауданының елді мекендеріне бөліп, Жайық өзенінің жағалауын күшейтуге кірістік, – деді 5-механикаландырылған бригада командирінің орынбасары подполковник Мұрат Тастаев. – Үлкен ықыласпен жұмыс істедік. Елді мекендердің су басуына жол бермеу үшін су деңгейінің көтерілу қаупі бар жерлерге бөгет тұрғызып, күшейтіп үлгеру маңызды болды. 

Алдыңғы аға буын жауынгер жолдастармен бірге мерзімді қызмет сарбаздары да ауқымды жұмыс істеді және жағдайды қалпына келтіруге атсалысты. 

– Өңірде ауылды су басудың алдын алу үшін бөгет салдық. Көп нәрсе біздің іс-әрекетімізге байланысты екенін түсіндік, сондықтан тынымсыз жұмыс істедік, – деді мерзімді қызметтің қатардағы жауынгері қарағандылық Расул Әлжанов. – Осы кезде біздің әскери ұжымның ынтымағы бұрынғыдан да арта түсті. 

Қазіргі уақытта Атырау облысында Шымкент және Гвардейск гарнизондары әскери бөлімшелерінің жасағы жұмысын жалғастыруда. Оларды үйге қайтару туралы шешім жағдай тұрақталғанда қабылданатын болады. 

Су тасқынына қарсы іс-шаралар басталғаннан бері «Оңтүстік» өңірлік қолбасшылығының әскери қызметшілері екі миллионға жуық құм салынған қап толтырды, 400 шифер жабылып, 13 арық ағыны бекітілді. Олар көтерген бөгеттің ұзындығы 140 мың метрді құрады. Осының үштен бірін Бауыржан Момышұлы атындағы 5-ші механикаландырылған бригаданың әскери қызметшілері орындады.

Ақпарат көзі: Министерство обороны Республики Казахстан