Астаналық оқушылар «Таза Қазақстан» экоакциясына белсенді үлес қосып келеді. Табиғат жанашырларының атсалысуымен №43 қосымша білім беру мектеп-орталығында алма бағы отырғызылып, биылғы маусымда мол жеміс береді деп күтіліп отыр, деп хабарлайды елорда әкімдігінің ресми сайты.

Жасыл желекке бөленген мектеп ауласындағы шағын бақта 30 түп алма ағашы егілген. Бұдан бөлек, жылыжай маңына тағы да 20 түп осы көпшілік жақсы көретін жеміс ағашы бой түзеген.

«Біздің мектеп – жай мектеп емес, қосымша білім беру орталығы. Яғни, біз балаларға біліммен қоса қоршаған ортаны қорғауға бағытталған тәлім-тәрбие береміз. Экологиялық бағыттағы үйірлеріміздің жұмысы елімізді «Таза Қазақстанға», жерімізді жасыл мекенге айналдыруға басымдық береді. Сол үйірмелер аясында мектебімізді көгалдандыру үшін Орал қаласындағы жеміс ағаштары тәлімбағынан Астана қаласы Білім басқармасы мен Әдістемелік орталықтың қолдауымен алма ағаштарын әкеліп отырғыздық. Жеміс ағаштарын мектеп оқушылары, ұстаздар, ата-аналар болып бірлесіп баптап, жетілдірдік. Ауламыздағы жасыл желектің жайқалуына қауымдастықтар мен тұрғындар да көмектесті. Нәтижесінде биыл алма бағы жақсы жеміс бергелі тұр», - деді мектеп-орталықтың директоры Нұртас Жағабаев.

Мектеп ауласында тек алма бағы ғана емес, 18 гектардан астам жылыжай және ағаштар мен гүлзарлар бар. Бұларды жазғы маусымда білім ошағында оқитын шәкірттерден жасақталған «жасылелдіктер» тобы кезекпен баптап, күтеді.

Сонымен қатар, елордада жасөспірімдер мен жастар арасында қоршаған ортаны қорғау, оны аялау сезімдерін ұялату, сонымен қатар, жастарды еңбекке баулу мақсатында «Жасыл ел» бағдарламасы іске асырылып жатыр.

Айта кетейік, «Жасыл ел» жобасы аясында елордада биыл 14-35 жас аралығындағы 4200-ден астам жастар жұмыспен қамтылатын болады. Олар қаламыздың құрылыс нысандарында, қала маңындағы «Жасыл белдеуде», әлеуметтік нысандардың, жалпы білім беру мекемелері мен қалалық саябақтардың аумағында жұмыс істейді.

«Біз үйірме жетекшілерінің ақыл-кеңесімен алма бағындағы ағаштарды, жылыжайдағы көкөністерді уақытымен суарамыз, арам шөптерін жұламыз. Ауладағы жасыл желектің бәрі тамшылатып суару жүйесі арқылы нәрлендіріледі. Бақтағы алмамыз қызарып жатыр, жылыжайдағы қияр, қызанақ, тәтті бұрыш, орамжапырақ, салат жапырақтары, пияз сияқты көкөністеріміз де жақсы жеміс беріп жатыр. Ал жемістер мен көкөністер піскен уақытта жинап аламыз», - деді мектеп оқушысы Кәмшат Илиясова.

Ал оқушылар өз қолымен өсірген жемістер мен көкеністерді теріп алған соң, бұлардан пайдалы өнім жасап шығарып, ғылыми жобаларға өзек етеді.

«Мектепті «Таза Қазақстан» экоакциясының мақсаты – тек сенбілікке шығу емес, еліміздің жасыл мекенге айналып, гүлденуіне үлес қосу. Біз де өз мектебіміздің маңына гүл егіп, ағаш егіп, осы ортақ мақсатқа жас ұрпақты жұмылдырып отырмыз», - деді мектеп директоры.

Ақпарат көзі: ГУ «Аппарат акима города Астана»