UALIKHANOV UNIVERSITY PENNSTATE UNIVERSITY-МЕН ЫНТЫМАҚТАСТЫҚ ТУРАЛЫ МЕМОРАНДУМҒА ҚОЛ ҚОЙЫЛДЫ

  Әлемнің жетекші университеттерімен халықаралық ынтымақтастық аясында Көкшетауға АҚШ-тың Пенсильвания штатынан делегация келді. Penn State-те әлемнің түкпір-түкпірінен 45 мыңнан астам студент оқып, 8 мыңға жуық оқытушылар жұмыс істейді. Солардың ішінде қазақстандық ғалымдар мен ұстаздар да бар.

  Кездесу барысында қонақтарға ядролық-магниттік резонанс және су сапасы зертханаларының функционалдық мүмкіндіктері таныстырылды. Penn State пен Ualikhanov University өкілдерінің кездесуі барысында көкшетаулық тарап медицина, экология, ауыл шаруашылығы сияқты сала ғалымдары мен студенттерінің жетістіктерін атап өтті. «500 ғалым» бағдарламасы бойынша ғылыми тағылымдамадан өту мүмкіндіктері, сондай-ақ бірлескен инновациялық орталық ашу мүмкіндігі талқыланды.

  Кездесудің маңызды сәті ынтымақтастық туралы екіжақты меморандумға қол қою болды. Құжатқа Ш.Уәлиханов атындағы университет ректоры Марат Сырлыбаев пен Penn State Global проректорының міндетін атқарушы Сабина Клар қол қойды. Өзара түсіністік туралы меморандум аясында тараптар кәсіптік оқыту бағдарламалары, оқытушылар мен ғалымдардың алмасуы, бірлескен ғылыми жобалар мен білім беру бағдарламалары, бірлескен семинарлар мен басқа да академиялық іс-шараларды әзірлеу және өткізу сынды ынтымақтастық түрлерін қарастырады. Көкшетау тарапы бұл келісім студенттерге ғылыми-зерттеу қызметінде орасан зор тәжірибе алуға, сондай-ақ жинақталған білімдерін американдық ғалымдармен бөлісуге көмектесетініне сенімді.

  Сонымен қатар Ualikhanov University оқытушылар құрамы Пенсильвания делегациясымен кездесті. Кездесулерде жаратылыстану ғылымдары саласындағы инновациялық ынтымақтастық бағыттары, STEM білім беруді дамыту, коммуникациялар саласындағы тәжірибе алмасу мәселелері талқыланды. Сапар соңында екі жоғары оқу орнының әкімшілігі алдағы серіктестікті дамыту перспективаларын талқылады.

Ақпарат көзі: Қазақстан Республикасы Ғылым және жоғары білім министрлігі