ЯДРОЛЫҚ ФИЗИКА ИНСТИТУТЫНЫҢ ПОЛЬШАНЫҢ БЕДЕЛДІ УНИВЕРСИТЕТІМЕН ЫНТЫМАҚТАСТЫҒЫ ЖАҢА ДЕҢГЕЙГЕ ШЫҒАДЫ

  Ядролық физика институты және Варшава университеті (Uniwersytet Warszawski) эксперименттік және теориялық атомдық және ядролық физика, сондай-ақ пәнаралық қолданбалар саласындағы ғылыми зерттеулер бойынша ынтымақтастықты жалғастырады. Бұл ынтымақтастық академиялық алмасуды, семинарлар мен ғылыми кездесулерге қатысуды, сондай-ақ бірлескен эксперименттер мен зерттеу жобаларын өткізуді қамтиды.

  200 жылдан астам тарихы бар Варшава университеті – Польшадағы ең көне және беделді жоғары оқу орындарының бірі, бірнеше поляк Нобель лауреаттарының альма-матері. Университет QS World University Rankings әлемдік рейтингінде 262-орында тұр. Бүгінгі күні мұнда 3100-ден астам оқытушы жұмыс істейді және 56 мың студент оқиды.

  Институттың Төмен энергиялы ядролық реакциялар зертханасы мен Варшава университетінің Ауыр иондар зертханасы арасындағы ынтымақтастықты жалғастыру туралы келісім 25 маусымда ресми түрде расталды. Құжатқа Институттың бас директоры Саябек Сахиев және Варшава университетінің ректоры Алоизий Новак қол қойды.

  Соңғы 10 жыл ішінде Варшава университетінің Ауыр иондар зертханасы мен Қазақстанның Ядролық физика институтының ғылыми топтары жеңіл зарядталған бөлшектер мен ауыр иондармен 1p-қабық ядроларындағы ядролық реакциялар бойынша бірлескен эксперименттік және теориялық зерттеулерді сәтті жүргізді. Бұл ынтымақтастық 2015 жылы қол қойылған ғылыми-техникалық ынтымақтастық туралы Меморандум аясында жүзеге асырылуда. Бірлескен зерттеулердің нәтижелері шетелдік жоғары рейтингті ғылыми журналдарда жарияланған 20-дан астам мақаланы және Қазақстаннан сегіз жас ғалымның докторлық диссертацияларын қорғауды қамтиды.

  Кездесу барысында тараптар докторантура, постдокторантура мамандары мен кәсіби-техникалық кадрларды бірлесіп даярлауды атап өтті.

Ақпарат көзі: Қазақстан Республикасы Ғылым және жоғары білім министрлігі