Жұмысшы мамандықтар жылы аясында Халықаралық инженерлік-технологиялық университетінде (ХИТУ) Алматы қаласының жетекші колледж басшыларымен кездесу өтті. Кездесуге Халықаралық инженерлік-технологиялық университет колледжі, Алматы технологиялық колледжі, Алматы құрылыс-техникалық колледжі, Almaty Polytechnic College, сондай-ақ Туризм және қонақжайлылық индустриясы колледжінің директорлары қатысты. 

Қазіргі уақытта жұмысшы мамандықтарын дамыту жөніндегі бастама аясында 30 өңірлік жоғары оқу орны 100-ге жуық колледжді өздеріне бекіткен. Бұл университеттер мен колледждерге ел экономикасы үшін сұранысқа ие кадрларды даярлау ісінде бірлесе жұмыс істеуге мүмкіндік береді. 

Кездесу барысында жаңа білім беру бағдарламаларын әзірлеу, ғылыми зерттеулер мен инновациялық жобаларды дамыту, сондай-ақ білім беру ұйымдары арасында тәжірибе және кадр алмасу мәселелері талқыланды. Негізгі назар қазіргі еңбек нарығының талаптарына сай келетін және Қазақстан экономикасының тұрақты дамуына ықпал ететін жұмысшы және техникалық мамандықтар бойынша мамандар даярлауға қойылды. 

Кездесу аясында ХИТУ мен колледждер арасында ынтымақтастық туралы меморандумға қол қойылды. Құжаттың мақсаты – инновациялық ресурстарды біріктіру және жоғары білікті мамандарды даярлау үшін бірлескен білім беру бағдарламаларын әзірлеу. 

Меморандум аясында білім беру бағдарламалары мен курстарын бірлесіп әзірлеу, студенттер үшін тағылымдамалар мен тәжірибелерді ұйымдастыру, бірлескен ғылыми зерттеулер жүргізу, оқу үдерісіне инновациялық шешімдерді енгізу, жастар арасында жұмысшы мамандықтарын насихаттау сияқты ынтымақтастықтың негізгі бағыттары анықталды.

Ақпарат көзі: Қазақстан Республикасы Ғылым және жоғары білім министрлігі