9 шілде күні ҚР Сауда және интеграция министрлігі Техникалық реттеу және метрология комитетінің Ұлттық аккредитация орталығында аккредитация саласындағы ынтымақтастықты тереңдету мақсатында кездесу өтті. Кездесуге ҚХР Мемлекеттік нарықты реттеу басқармасының (SAMR) Сертификаттық қадағалау департаменті бас директорының орынбасары Чэнь Хайян, SAMR Сертификаттық қадағалау департаментінің сапа сертификаттау бөлімінің директоры Чжан Вэй және Қытайдың сәйкестікті бағалау саласындағы аккредитациясының ұлттық қызметі (CNAS) аккредитацияны қадағалау бөлімінің аға инженері Ян Чжэ қатысты.

ҰАО басшылығы мен ұжымы атынан қонақтарды ҰАО бас директорының орынбасары Ержан Қарасаев қарсы алды.

«Сіздің Қазақстанға жұмыс сапарыңыз біздің елдер арасындағы экономикалық байланыстардың дамуына жаңа серпін береді», - деді ҰАО өкілі. «Қытай – Қазақстанның тарихи көршісі және стратегиялық серіктесі, ал аккредитация саласындағы ынтымақтастықты нығайту – екі мемлекеттің тату көршілігі мен өзара түсіністігінің жарқын көрінісі. Қытайдың аккредитация және сертификаттау жүйесі өкілдерінің келуі сапа саласындағы ортақ мақсаттардың, тұтынушының мүддесін көздеудің, саудадағы кедергілерді азайтудың және екі елдің қолайлы экономикалық болашағының өзара түсіністігін білдіреді».

Қазақстан мен Қытай арасындағы аккредитация саласындағы ынтымақтастық ILAC (зертханаларды аккредитациялау) және IAF (сертификаттау органдарын аккредитациялау) халықаралық аккредитация ұйымдары аясында жүзеге асырылады, оның мүшелері ҰАО және CNAS болып табылады.

Сонымен қатар, 2019 жылдың 26 қазанында Франкфурт-на-Майне қаласында ҰАО мен CNAS арасында өзара түсіністік және ынтымақтастық туралы меморандумға қол қойылды. Құжат аясында 2024 жылдың басында ҰАО CNAS-қа ISO/IEC 17020, ISO 21001, EN 9100, ISO 3900, ISO 7101, ISO/IEC 17043 және ISO 15189 стандарттары бойынша бірқатар оқыту семинарлары мен тағылымдамаларды бірлесіп өткізуге өтініш жіберді.

Қытай тарапымен өткен кездесуде қазақстандық және қытайлық сарапшылардың қатысуымен халықаралық стандарттар бойынша тағылымдамалар өткізу туралы келісімдерге қол жеткізілді: ISO/IEC 17043 бойынша тағылымдамалар Қазақстанда осы жылдың шілде айының соңына дейін, ISO 15189 және ISO 39001 бойынша тағылымдамалар Қазақстанда, ал ISO/IEC 17020 және ISO 21001 бойынша тағылымдамалар Қытайда 2024 жылдың екінші жартысында өткізіледі.

Кездесу барысында тараптар екі ел экономикасының игілігі үшін ынтымақтастыққа, тәжірибе алмасуға, аккредитация мүмкіндіктерін дамытуға әрдайым дайын екендіктерін растады.

Кейіннен қонақтар ҰАО аккредитация нысанына барып, «Балтық Контроль» ЖШС қызметімен танысты және қытайлық қонақтар Қазақстандық тауарлардың ҚХР-ға экспортын арттыру үшін стандарттарды үйлестіру мәселелерін талқылады.

Ақпарат көзі: Министерство торговли и интеграции Республики Казахстан