Жамбыл облысының 85 жылдығына орай аудандарда мәдениет күндері жалғасуда. Кезекті мәдени-көпшілік шара Шу ауданында өтті, оған Жамбыл облысының әкімі Ербол Қарашөкеев қатысты.

Мерекелік шара барысында 500-ге тарта аудан тұрғыны ерекше әсерге бөленді. Қонақтар өткенге саяхат жасап, қазақ халқының мәдени мұрасы мен өнеріне көз жүгіртті. Ұмыт болған салт-дәстүрлерден тағлым алып, ұлттық ойын түрлерінен бақ сынасты.

Бұдан бөлек, Шу ауданының кешегісі мен бүгінінен сыр шертетін тақырыптық көрмелер, ауыл шаруашылығы өнімдерінің жәрмеңкесі көпшілік назарына ұсынылды. Түрлі этнос өкілдері де өнерлерін ортаға салып, кәдесыйлары мен ұлттық дәмдерін таныстырды.

Мерекелік шара өнер майталмандарының гала-концертіне ұласты. Сахна шымылдығы мәдени мұраларды қастерлеп, насихаттауға үндейтін театрландырылған қойылыммен ашылды.

Бұдан соң 150 жас өнерпаз бір мезетте белгілі күйші-композитор Әбдімомын Желдібаевтың «Ерке сылқым» күйін күмбірлетті.

Облыс әкімі Ербол Қарашөкеев жиналғандарды өнер мерекесімен құттықтап, Шу өңірінің шежіре мен тарихқа толы мекен екенін атап өтті.

– Мәдениет пен өнер – халқымыздың болмысын, еліміздің тарихы мен бірегейлігін айшықтайды. Шу өңірі күллі қазаққа, әлемге әйгілі тұлғалар шыққан өлке, ғұлама ғалым Жүсіп Баласағұн, халқымыздың төбе биі Төле би бабамыздың атамекені. Сөз зергері Бөлтірік шешен, Сауытбек, Қуандық, қыл қобызды Бармақ, Жақсыбай, Қылышбай, Жидебай секілді ақындарымыз шыққан шырайлы өлке.

Сондай-ақ осы өңірден шыққан ақын, әнші, термеші, композитор Аяз Бетбаев, дәстүрлі музыканы сабақтастырған тұлға, күйші-композитор Әбдімомын Желдібаевтың есімін ерекше атап өткен жөн.

Қазақтың ақын қызы Бақыт Исаева, жезтаңдай әнші Күлімхан Оңтайқызы, «Шу» театрының негізін құрушы Ермек Құлажановтардың да өнерге қосқан еңбектері жоғары.

Олардың мол мұрасы өскелең ұрпақ үшін қай кезде де таусылмас қазына, — деді аймақ басшысы.

Еске сала кетейік, ұлттық құндылықтарды ұлықтап, төл тарихты таразылап, дәстүрлі дала мәдениетін дәріптеу мақсатында биыл екінші жыл қатарынан облыс аудандарында мәдениет күні ұйымдастырылуда.

Айта кетейік, бүгінде облыс бойынша 503 мәдениет мекемесінде 3 395 маман еңбек етеді. Соңғы 3 жылда 19 мәдениет нысаны бой көтеріп, ел игілігіне берілді. Биыл 8 мәдениет нысанының құрылысын аяқтау жоспарланып отыр.

Ақпарат көзі: КГУ «Аппарат акима Жамбылской области»