Қ.Жұбанов атындағы Ақтөбе өңірлік университетінің «Мәңгілік ел» залында Ақтөбе облысы әкімдігі жанындағы Жастар істері жөніндегі кеңес отырысы өтті.

Іс-шара барысында 2024 жылы өңірдегі мемлекеттік жастар саясаты саласында атқарылған жұмыстар және алдағы жоспарлар туралы талқыланып, өңірлік студенттік омбудсмен институтымен бірлесе жатақханалардың жағдайына жүргізілген мониторинг қорытындысы айтылды. Сонымен бірге 12 тамыз — Халықаралық Жастар күніне орай белсенді жастар марапатталды.

Аталған кеңеске қатысқан облыс әкімі Асхат Шахаров жастарды мерекемен құттықтап, өңірде атқарылып жатқан жастарды қолдауға бағытталған іс-шараларға тоқталды.

«Мемлекет басшысы Қасым-Жомарт Тоқаев Жолдауында жастардың бастамаларына қолдау көрсету жалғасатындығын және жеңілдетілген әлеуметтік бағдарламаларды іске асыруды тапсырды. Жас буын қай кезде де болашаққа сеніммен қарауы керек, ол үшін елімізде жастарға бар жағдай жасалып отыр. Биыл облыста жастар саясаты мәселелері басқармасы құрылды. Барлық департаменттер мен басқармаларда жастар мәселелерімен айналысатын жауапты адамдар белгіленді. Яғни жастарға әр салада қолдау көрсетуге бағытталған жұмыстар жүргізіліп жатыр. Міне, осындай алаңдарда жиі кездесіп, өз ойларыңызды айтып, ұсыныстарды талқылауға мүмкіндік бар. Елімізде жастардың республикалық, халықаралық деңгейдегі түрлі іс-шараларға қатысуына, басқа да өз идеяларын жүзеге асыруына мемлекеттік деңгейде қолдау көрсетіліп отыр», — деді облыс әкімі.

Сонымен бірге Мемлекет басшысының талантты жастарды қолдау тапсырмасы негізінде облыста бірқатар жобалар іске асырылып жатқаны, соның ішінде «Тәуелсіздік ұрпақтары» гранты, «Жасыл ел» жобасы, «Еріктілік институтын дамыту», «Aqtobe Camp», «Қоғамдық дәріс» сынды бірқатар жобалар туралы айтылды. Сонымен бірге өңір басшысы «Отбасы банк»

АҚ-мен бірлесе қолға алынған  «Aqtobe jastary» тұрғын үй бағдарламасы бүгіннен бастап іске қосылатыны айтты. Оған 1 млрд. теңге бөлініп отыр.

«Жастар рухы» Жастар қанаты Ақтөбе облыстық филиалының төрағасы Ә.Тыныштық өңірлік студенттік омбудсмен институтымен бірлесе студенттік жатақханалардың жағдайына  жүргізілген мониторинг қорытындысын жария етті. Оның айтуынша, «Жастар рухы» Жастар қанаты студенттік жатақханалардың оқу жылына дайындығын тексеру мақсатында Ақтөбе қаласындағы оқу орындардың жатақханаларының тұрмыстық жағдайын дәстүрлі түрде жыл сайын бақылап келеді.

«Мониторингтік топтың тексерісі нәтижесінде аталған Жұбанов университеттің №1, №2, №3 және «Жастар үйі» жатақханалардың жаңа оқу жылына толық дайын екеніне көзіміз жетті. Ал Марат Оспанов атындағы Батыс Қазақстан медицина университетінің Пацаев көшесінде орналасқан өзге ел азаматтары орналасқан №1 жатақханасы сын көтермейді», — деді ол.

Облыстық жастар саясаты мәселелері басқармасының басшысы М.Ермағанбетов 2024 жылы өңірдегі мемлекеттік жастар саясаты саласында атқарылған жұмыстар және алдағы жоспарлар туралы бөлісті. Оның айтуынша, облыста осы жылдың екінші тоқсанында NEET санатындағы жастар — 5,6%. Облыстағы

жастар арасындағы жұмыссыздық деңгейі — 1,8%. 13 291 жас жұмыспен қамту іс-шараларымен қамтылған, 4732 жас тұрақты жұмысқа орналасқан, «Жасыл ел» бағдарламасына 1983 жас қатысса, 14 адам «Zhas project» грантын иеленген. Сонымен бірге М.Ермағанбетов жастар арасындағы құқықбұзушылықтың алдын алу бойынша жаңа жобалар мен  «Ақтөбе жастары» тұрғын үй бағдарламасы туралы да ақпарат берді.

Іс-шара аясында 12 тамыз — Халықаралық жастар күніне орай әр салада еңбек етіп жүрген белсенді жастар облыс әкімінің және облыс әкімі орынбасары атынан Алғыс хаттармен марапатталды.

Ақпарат көзі: ГУ «Акимат Актюбинской области»