Бүгін Білім күнінде Жетісу облысының Көксу ауданы Қаратал ауылында жаңа мектеп іске қосылды. Жиырма бес балаға арналған мектепке дейінгі шағын орталығы бар 120 орынды Қаратал мектебінде 1-11 сыныптарда 100-ден астам бала оқитын болады. Бұрынғы мектеп 1970 жылдары салынған, бейімделген ғимаратта отырған бастауыш мектеп болатын. Енді жаңа мектептің салынуының арқасында балаларды тасымалдап оқыту, ыстық тамақпен қамту мәселелері шешімін тапты, - деп хабарлайды Жетісу облысы әкімінің баспасөз қызметі.

Қаратал ауылындағы мектептің құрылысы өткен жылы сәуір айында басталып, биылғы жаңа оқу жылына пайдалануға беріліп отыр. Мектепте 12 орындық кітапхана, спорт зал, 80 орынды мәжіліс залы, 40 орынды асханақарастырылған. Мұнда жаңа модификациялы физика, химия, биология және мультимедиялық кабинеттер, ағаш ұсталығына, ас пісіруге, киім тігуге арналған құрал-жабдықтармен қамтылған шеберханалар бар. Алаңсыз білім алуға барлық мүмкіндіктер жасалған осындай жаңа білім мекемесінің ашылғанына оқушылар да, мұғалімдер де риза. 

- Қаратал бастауыш мектебінде жұмыс істегеніме 20 жыл болды, дене шынықтыру пәнінен сабақ беремін. Спорт залдың жоқтығы сабақ өткізуде біршама қиындық тудыратын еді. Енді балалар арнайы құрал-жабдықтары бар спорт залда жаттығатын болады. Сол сияқты бұрын буфеттік тамақтандыру болса,қазір жаңа ғимараттағы асханада балалар ыстық тамақпен қамтылады. Мұның бәрі балалардың денсаулығын нығайтуға ықпал етеді. Бес жүздей тұрғыны бар шағын ауылымыз үшін бұл үлкен қуаныш, - дейді Қаратал мектебінің мұғалімі Құсайын Күреңов.

Жаңа мектептің ашылуына байланысты үлкен сыныптардағы балалардың басқа ауылдардағы мектептерге тасымалданып оқытылу мәселесі де шешілді.

- Менің 4 балам бар, оның 3-еуі мектеп жасында, 1-еуі шағын орталыққа барады. 9 сыныпқа көшкен үлкен балам бұған дейін Балпық би ауылындағы мектепке барып оқитын. Күнделікті қатынау әрине қолайсыз, арнайы мектеп автобусының тасымалы ұйымдастырылғанымен, біз ата-ана ретінде алаңдап отыратынбыз. Енді ешқайда бармай-ақ ауылымыздағы жаңа мектепте оқиды. Өзім медицина саласында еңбек етемін. Бұрын шағын орталық жарты күн ғана жұмыс істеді, сондықтан сағат түскі 12-ден кейін кіші баламды не әжесі, не балаларым қарайтын. Қазір жаңа мектептің жанындағы орталықтың кешке дейін жұмыс істейтінін естіп қуанып отырмыз, - дейді ауыл тұрғыны, ата-ана Айгерім Түсіпбекова.

Атап өтсек, жаңа оқу жылында мектеп сыныптарына 107 бала, мектепке даярлық тобында 10 бала, шағын орталыққа 25 бала қабылданды, 24 педагог жұмыс жасайды.

Жалпы Жетісу облысының әкімі Бейбіт Исабаевтың тапсырмасымен өңірдегі білім саласын дамытуға, соның ішінде нысандардың құрылысы мен күрделі жөндеуіне, материалдық-техникалық базасын нығайтуға, педагогтардың біліктілігін арттыруға ерекше көңіл бөлініп отыр. Биыл бұл салаға 21,5 млрд. теңгеқарастырылды. Атап айтқанда, 7 білім беру нысанын күрделі жөндеуге 6,5 млрд. теңге, материалдық-техникалық базаны нығайтуға 2,9 млрд. теңге, оқулықтар мен оқу-әдістемелік құралдарды сатып алуға 1,6 млрд.теңге бағытталды.

Еске салсақ,жылсоңына дейін облыстыңАқсу, Алакөл, Панфилов аудандарында 3 мектептің құрылысы аяқталады деп күтілуде.

Жетісу облысы әкімінің баспасөз қызметі.

Фототілші: Дмитрий Ерофеев

Ақпарат көзі: Жетісу облысының әкімдігі