Ақши ауылы Алакөл көлі жағалауындағы ерекше қажеттілігі бар балаларға арналған «Жансая» жазғы сауықтыру лагерінде биылғы жазғы маусым басталғалы 103 бала тегін демалып қайтты. Жалпы осы маусымның соңына дейін  мұнда облыстың әр түкіпірінен келген 165 бала демалады деп жоспарланған, - Жетісу облысы әкімінің баспасөз қызметі.

Өткен жылы Алакөл ауданы әкімдігінің бұрынғы резиденциясының ғимаратына жөндеу жұмыстары жүргізіліп, 6 - 18 жас аралығындағы мүгедектігі бар балаларға арналған «Жансая» оңалту бөлімшесі бар күндізгі болу орталығына» қарасты 40 орындық «Жансая» жазғы сауықтыру лагері ашылған болатын. Мұнда балаларды оңалтуға барлық жағдай жасалған. Алакөл көлінің жағалауындағы белсенді демалыс балаларды сауықтырумен қатар, оларды әлеуметтендіруге оң ықпалын тигізеді дейді мамандар.  

Өткен жылы жазғы кезеңде бұл лагерь заңды өкілдерімен бірге 127 баланы қабылдаса, биылғы жылы демалатын балалардың саны 165-ке жетеді деп жоспарланып отыр.

- Әр бала 5 күннен демалады. Балаларды қабылдау I-ІІІ топтағы мүгедектігі бар баланың тіркелген жері бойынша дәрігердің ұсынысы немесе қорытындысы негізінде жүзеге асырылады. Орталыққа жол жүруді ұйымдастыруды заңды өкіл немесе еріп жүретін адам тұрғылықты жерінен Үшарал қаласына дейін дербес жүзеге асырады, бұдан әрі оларды Ақши ауылына, лагерьге жеткізуді орталықтың өзі ұйымдастырады, - деді облыстық жұмыспен қамтуды үйлестіру және әлеуметтік бағдарламалар басқармасы басшысы Ермек Мизамбаев.

Лагерьде сауықтыру шараларын қабылдап жатқан балалардың ішінде өткен жылы болғандары да бар.

«Біз қызымыз екеуміз Сарқан қаласынан екінші жыл қатарынан келіп отырмыз. Мұнда ерекше қажеттілігі бар балаларды оңалтуға барлық жағдай жасалған, қызметкерлері де мейірімді. Әр жастағы балаларға жеке бағдарламалар жасалған. Көлдің суы шипалы. Қызым басқа балалармен де араласып достасып кетті. Мұның бәрі оның денсаулығына оң әсерін тигізіп жатыр», - дейді Анастасия Мацкова.

«Маған лагерь ұнады. Осы жерден өзіме көп достар таптым. Біз көлдің суына түсеміз, сурет саламыз, билейміз. Демалыс көңілді өтіп жатыр. Келесі жылы тағы да келгім келеді», - дейді лагерьге келушілердің бірі он жасар Ералы Салам. 

Жалпы Жетісу облысында балаларға тегін оңалту қызметін көрсететін 6 орталық бар. Оның 5-еуі Жетісу облысы құрылғаннан бері іске қосылды. Сонымен қатар биыл республикада бірінші болып Талдықорған қаласында 18 жастан асқан мүгедектігі бар азаматтарға арналған стационар орталық ашылды.

Жетісу облысы әкімінің баспасөз қызметі.

Ақпарат көзі: Жетісу облысының әкімдігі