Жетісу облысында масақты дәнді дақылдарды жинау науқаны аяқталуға таяды. Бүгінгі күнге облыс көлемінде жиналған алқап аумағы 211 мың га немесе 85%, - деп хабарлайды Жетісу облысы әкімінің баспасөз қызметі.

Жалпы облыс көлемінде ауыл шаруашылығы дақылдарының егістігі 510,1 мың га. Оның ішінде масақты дәнді дақылдар 253,1 мың га алқапқа егілсе, соның 98,3 мың га – бидай, 152,1 мың га - арпа.

- Бүгінгі күні облыста масақты дәнді дақылдардың 211 мың га немесе 85% жиналды, 481 мың тонна астық бастырылды, орташа өнімділік гектарына 22,9 центнерден айналуда. Егін жинау науқаны жалғасып жатыр. Биыл жақсы өнім болады деп жоспарлап отырмыз, - деді облыстық ауыл шаруашылығы басқармасының бөлім басшысы Аманбек Қасымов.

Мәселен, Сарқан ауданында да егін ору науқаны қазіргі кезде 85% орындалып, бітуге жақындады. Ауданда 117 мың тонна астық жиналған, әр гектардың орташа шығымдылығы 25 центнерден айналып отыр. Бұл ретте аталған аймақта 1500 шаруа қожалығы болса, соның 500-і масақты дәнді дақылдар өсірумен айналысады. Солардың қатарында Алмалы ауылдық округіндегі «Жұмағали» шаруа қожалығы да бар.

Шаруа қожалығының жетекшісі Егемен Жұмағалидың айтуынша, масақты дақылдарды оруды бір ай бұрын бастаған.

- Биыл 1200 гектар жерге бидай мен арпа ектік. Етек жақта егін ору жұмыстарын ақтадық, енді таулы аймақтардағы арпа егістіктерінде жүрміз. Мұнда үш комбайн егін орса, екі КАМАЗ өнім тасиды. Биыл өнім жақсы шықты, орташа есеппен гектарына 25 центнерден айналды. Қазір жұмыстар 70%-ға орындалды, ауа райы ашық, жайлы болса бір аптадан кейін егін орағын толығымен аяқтаймыз. Өсірген өніміміздің бір бөлігін өңдеуге өткіземіз. Мәселен, арпаның «Планета» сортының өнімін Текелі ашытқы зауытына тапсырамыз. Қазір бізде 30-ға жуық адам еңбек етеді, 20 бірлік техникамыз бар, - деді шаруа қожалығының жетекшісі Егемен Жұмағали.

Атап өтсек, облыста агроөнеркәсіптік кешенді қолдауға биыл 34,9 млрд. теңге бағытталған, соның 23,2 млрд. теңгесі немесе 66,5% - субсидия. Бүгінгі күні жеңілдетілген бағадағы дизель отынымен қамту мақсатында оператор мен 178 шаруашылықтың арасында 3441,1 тоннаға келісім-шарт жасады, соның ішінде 106 шаруа қожалығына жеңілдік бағамен 1388,9 тонна дизель отыны жеткізілді. Сол сияқты өткен 7 айдың ішінде өңірдегі ауыл шаруашылығы тауар өндірушілері жалпы құны 9,1 млрд. теңге болатын 664 бірлік жаңа техниканы «ҚазАгроҚаржы» және «Аграрлық несие корпорациясы» АҚ-лары арқылы, сондай-ақ өз қаражаттарына сатып алған. Осы жылы ауыл шаруашылығы өнімінің жалпы көлемі өңірде 514 млрд. теңгеден асады деп жоспарланып отыр.  

Жетісу облысы әкімінің баспасөз қызметі.

Фотограф: Дмитрий Ерофеев

Ақпарат көзі: Жетісу облысының әкімдігі