Жетісу облысындағы Қаратал ауданында әскери комиссариаттың жаңа форматта жасақталған еліміздегі алғашқы ғимараты пайдалануға берілді. Бүгін жаңа нысан салтанатты түрде ашылып, мерекелік шараға ҚР Қорғаныс министрлігінің аппарат басшысы, полковник Ербол Құмарбекұлы қатысты, - деп хабарлайды Жетісу облысы әкімінің баспасөз қызметі.

Ербол Құмарбекұлы өз құттықтау сөзінде Мемлекет басшысының қорғаныс саласына ерекше назар аударып отырғанын айта келе, елімізде атқарылып жатқан саланы дамыту мен қолдау шараларына тоқталып өтті.

-  Бүгін жаңа типтегі әскери нысан Жетісу облысында тұңғыш ашылып отыр. Әскерге баратын жастардың әскери өмірмен алғашқы таныстығы осы жерден басталады. Сондықтан объектінің осындай заманауи болғаны өте дұрыс деп санаймын. Бұл ретте бізге қолдау көрсеткен облыс әкімдігіне ризашылығымызды білдіреміз, - деді Ербол Құмарбекұлы.

Атап өтсек, бұған дейін Қаратал аудандық қорғаныс істері жөніндегі бөлім Бастөбе ауылдық округінде отырған еді. Енді Үштөбе қаласындағы жаңарған ғимаратқа орналасты. Нысанға жергілікті бюджет есебінен 395 млн. теңге бөлініп, күрделі жөндеуден өткізілді.

Ғимараттың бірінші қабатында әскерге шақыру пункті, медициналық комиссияның тексеру кабинеттері орналасқан. Сондай-ақ әскерге шақырылушыларға арналған казармалық типтегі жатын орын мен тамақтану бөлмесі бар. Екінші қабатта әкімшілік бөлімі отырады. Яғни әскери басқарманың жергілікті органы мен шақыру пункті бір ғимаратқа топтастырылған. Әдетте олар бөлек ғимараттарда орналасатын.  

Әскер қатарына жаңадан шақырылған жастардың бірі Досымхан Досымжан: «Мен осы Қаратал ауданының тұрғынымын. Жаңадан ашылған ғимараттан әскерге аттанғалы отырмын. Мен және менің қатарлас достарым елімізге адал қызмет етеміз», - деді. 

Жетісу облысы әкімінің баспасөз қызметі.

Фотограф: Жұмабай Мұсабеков

Ақпарат көзі: Жетісу облысының әкімдігі