ҚР Жоғары аудиторлық палатасының мүшесі Расул Рахимов пен аппарат басшысы Құндызбек Әбдірасылов Португалия Аудиторлар сотының судьясы Мария Да Луш Кармезим Фариямен мемлекеттік аудиттің тиімділігін арттыру және жетілдіру мәселелерін талқылады.

Тараптар екі елдің мемлекеттік аудит органдары арасындағы тығыз және жемісті ынтымақтастықтың өткен жылдың көктемінде Өзара түсіністік туралы меморандумға қол қоюмен (білім, тәжірибе және ақпарат алмасу) айтарлықтай нығайғанын атап өтті.

Бүгінгі таңда Португалия Аудиторлар соты «дәрежесі бойынша тең» форматында ҚР Жоғары аудиторлық палатасы қызметін тексеру процесінің үйлестірушісі болып табылады. Оның аясында Астанаға жұмыс сапарымен келген Литва, Португалия және Түркия аудиторлары Жоғары аудиторлық палатаның қызметіне талдау жүргізуде.

Жоғары аудиторлық палатаның мүшесі Расул Рахимов бұл іс-шараның ҚР Жоғары аудиторлық палатасы үшін маңызы зор екенін атап өтті, өйткені қазіргі уақытта республикада мемлекеттік аудит жүйесін реформалау жүргізілуде. Атап айтқанда, Палатаның өкілеттіктері айтарлықтай кеңейіп келеді.

«Біз аудиттің үздік инновациялық әдістерін зерделеудеміз, халықаралық стандарттарды ұстануға және қызметкерлеріміздің біліктілігін жүйелі түрде арттыруға ұмтыламыз. Дәрежесі бойынша тең тексеру біз үшін Жоғары аудиторлық палатаның және жалпы мемлекеттік аудит жүйесінің қызметін жетілдіру жолында аса маңызды», — деді Расул Рахимов.

Өз кезегінде Мария Да Луш Кармезим Фария Португалияда мемлекеттік аудит жүйесі қалай құрылғанын айтып, өзара іс-қимылдың өзекті мәселелері бойынша пікір білдірді.

Тараптар ынтымақтастықты одан әрі нығайтуға уағдаласты.

Ақпарат көзі: Қазақстан Республикасының Жоғары аудиторлық палатасы