ЖОҒАРЫ ОҚУ ОРЫНДАРЫНДА ҚАБЫЛДАУ КОМИССИЯЛАРЫ ҚАРҚЫНДЫ ЖҰМЫС ІСТЕП ЖАТЫР

  Бүгін еліміздің жоғары оқу орындарда білім беру гранттарының конкурсына қатысу үшін өтініштер қабылдау басталды. Олардың қатарында Қожа Ахмет Ясауи атындағы Халықаралық қазақ-түрік университеті де бар.

  Мемлекеттік грант конкурсына құжат қабылдау басталған алғашқы сәттен бастап Ахмет Ясауи университетінің қабылдау комиссиясы штаттық режимде жұмыс істеп жатыр. Талапкерлердің өтініштері Ұлттық тестілеу орталғының базасы арқылы тіркелуде.

  Университет қызметкерлері мен амбассадор студенттерден құралған 60-тан астам адам талапкерлердің құжаттарын қабылдап, кеңес беріп, көмек көрсетіп жатыр.

  Сондай-ақ, Ахмет Ясауи университетінің базасында «Серпін» бағдарламасына қатысатын жоғары оқу орындарының да қабылдау комиссиясы жұмысын бастады.

  Түркістанға еліміздің солтүстік, шығыс және батыс өңірлерінен 10-нан астам университет келген, атап айтар болсақ: Қарағанды индустриялық университеті; Дәулет Серікбаев атындағы Шығыс Қазақстан техникалық университеті; Абай Мырзахметов атындағы Көкшетау университеті; Сәрсен Аманжолов атындағы Шығыс Қазақстан университеті; М. Дулатов атындағы Қостанай инженерлік-экономикалық университеті; Х. Досмұхамедов атындағы Атырау университеті; Шәкәрім университеті; Шоқан Уәлиханов атындағы Көкшетау университетi; Алихан Бөкейхан университеті; Манаш Қозыбаев атындағы Солтүстік Қазақстан университеті; Әлкей Марғұлан атындағы Павлодар педагогикалық университеті.

  Бұл университеттер оңтүстік өңірдің талапкерлеріне бағдарлама мен оқу орындарының мүмкіндіктері туралы толық ақпарат беріп, өз жұмыстарын белсенді жүргізіп отыр.

Ақпарат көзі: Қазақстан Республикасы Ғылым және жоғары білім министрлігі