VIII сайланған Парламенттің II сессиясына арналған Қазақстан Республикасы Парламенті Сенатының негізгі іс-шаралар жоспарына сәйкес Жоғары Сот Кеңесінде Сенат депутаттарымен кездесу болды.

Кездесуге Жоғары Сот Кеңесінің төрағасы Д.А. Шипп, Парламент Сенатының Конституциялық заңнама, сот жүйесі және құқық қорғау органдары комитетінің төрағасы Н.К. Бекназаров, Жоғары Сот Кеңесінің хатшысы – Жоғары Сот Кеңесі Аппаратының Басшысы Д.Б. Мұратбеков, Сот әкімшілігінің басшысы Н.Р. Ахметзакиров, Парламент Сенатының депутаттары, Кеңес мүшелері, Сенат, Кеңес және Сот әкімшілігі аппараттарының өкілдері қатысты.

Кеңес төрағасы Д. А. Шипп құттықтау сөзінде депутаттардың судьялар корпусының сапалық құрамын жақсарту, кадрлар даярлау жүйесін жетілдіру және судьялардың біліктілігін арттыру мәселелеріне көңіл бөлгені және нәтижелі диалогқа дайындығы үшін алғыс білдірді. «Соңғы жылдары, Мемлекет басшысының тапсырмасына сәйкес, біз осы бағыттарда елеулі қадамдар жасадық және бүгінгі кездесу қол жеткізген нәтижелерді талқылауға және одан әрі даму жолдарын айқындауға ерекше мүмкіндік береді», - деп атап өтті ведомство басшысы.

Өз кезегінде Парламент Сенатының Конституциялық заңнама, сот жүйесі және құқық қорғау органдары комитетінің төрағасы Н.К. Бекназаров кездесудің негізгі мақсаты сот жүйесінің кадр саясатының өзекті мәселелерін талқылау, сондай-ақ заңнамалық бастамаларды іске асыру бойынша одан әрі жұмыс істеу екендігін атап өтті.

Бұдан әрі Кеңес мүшесі, Жоғарғы Соттың судьясы Н.У. Сисенова және Сот әкімшілігінің басшысы Н.Р. Ахметзакиров баяндама жасады. Онда Мемлекет басшысының Қазақстан халқына жолдауларында айтылған тапсырмалары аясында 2023 жылдың наурызында қабылданған түзетулердің тиімділігі мен нәтижелілігі туралы айтылды.

Н.А. Сисенова өз баяндамасында сот жүйесіндегі кадр саясаты мәселелері бойынша қабылданған нормаларды іске асыру ерекшеліктерін атап өтті. Сот әкімшілігінің басшысы Н.Р. Ахметзакиров аудандық соттардың төрағаларын қызметке сайлау институты туралы, сондай-ақ сот жүйесіндегі жұмыстарды жақсарту, жаңадан енгізілген қадамдар мен перспективалар бойынша қабылданған өзге де шаралар туралы айтып берді.

Кездесу барысында жоғарыда аталған тақырыптар бойынша сындарлы талқылау және пікір алмасу болды, депутаттар бірқатар сұрақтар қойды. Атап айтқанда, депутаттық корпус Кеңестің ұсынымын алғаннан кейін судьялыққа кандидаттардың тағылымдамадан өтуі туралы нормаларды іске асыру, сондай-ақ, Сот қазылар алқасының заңдылықты өрескел бұзуға жол берілген әрбір күшін жойған сот актісін тексеру тетігін енгізу мәселелерін қозғады.

Кездесу соңында қатысушылар соңғы жылдары жүзеге асырылып жатқан реформалар судьялардың, сондай-ақ судья кадрларын даярлау және іріктеу, оларды тағайындау және біліктілігін арттыру институттарының кепілдіктері мен тәуелсіздігін күшейтуге негіз болғанын атап өтті.

Жоғары Сот Кеңесінің Аппараты

Ақпарат көзі: Қазақстан Республикасы Жоғары Сот Кеңесі