2024 жылғы 13-14 наурызда ҚР Орталық сайлау комиссиясы ұйымдастырған «Қазақстан Республикасында сайлау процесін ұйымдастырудың теориялық және практикалық негіздері» тақырыбы бойынша екі күндік оқыту семинары жаңадан сайланған аудандық, қалалық аумақтық комиссиялары төрағаларының орынбасарлары мен хатшыларына арналды.

Семинарды ҚР ОСК мүшесі Сәбила Мұстафина ашып, құттықтау сөзінде тыңдаушыларға оқыту курсының мақсаты мен міндеттерін жеткізді. Сайлау - бұл өзінің электоралдық кезеңдері, белгілі бір нормативтік, ұйымдастырушылық рәсімдері бар қоғамдық-саяси және құқықтық процесс екенін және сайлау процесінің барлық қатысушыларымен тиімді өзара іс-қимылды, сайлау комиссиясының әрбір мүшесінің құзыреті мен кәсібилік деңгейін үнемі арттыруды міндеттейтінін ескертті.

Оқу курсының негізгі спикерлері Орталық сайлау комиссиясы аппаратының бөлім меңгерушілері Сәуле Қозыбаева, Ерлан Қарабалаев, Әйгерім Тәжиева, Гүлназ Кембаева, Бауыржан Тұрғанбаев, Дәмегүл Қабиева болды.

Спикерлер сайлау процесін ұйымдастыру, оның ішінде сайлау алдындағы үгіт, электоралдық оқыту бойынша құқықтық және теориялық білімдерін ғана емес, сонымен қатар сайлау заңнамасындағы құқықтық жауапкершілік, сайлауды ақпараттық, қаржылық және құжаттамалық сүйемелдеу мәселелері бойынша практикалық сабақтар дайындады.

Сайлау комиссиясы қызметінің нақты жағдайлары талқыланды, әртүрлі кейстерді модельдеу, дұрыс шешімнің мүмкін жолдарын іздеу дағдылары пысықталды, сайлау барысында халықаралық миссиялар анықтаған негізгі ескертулер қаралды.

Сондай-ақ тренинг форматында тыңдаушылармен сайлау комиссиясының сайлауға дайындық кезеңінде, дауыс беру күні, сайлаушылардың дауыстарын санау және дауыс беру қорытындыларын белгілеу кезінде жұмыс істеу машықтары пысықталды. Бұдан басқа, көпшілік алдында сөз сөйлеуді, саяси партиялармен, байқаушылармен, бұқаралық ақпарат құралдарының өкілдерімен, үкіметтік емес ұйымдармен және сайлау процесінің өзге де қатысушыларымен өзара іс-қимылды дамыту дағдылары қорытыланды.

Тыңдаушыларды тестілеу сайлау заңнамасын, сайлау процесін ұйымдастырудың құқықтық негіздерін білу деңгейлерін анықтауға мүмкіндік берді.

Оқыту ұзақтығы 20 академиялық сағатты құрады, бағдарлама аумақтық сайлау комиссиясы мүшелерінің қызметін ескере отырып әзірленді және сайлауды ұйымдастырушылардың жаңа құрамының кәсіби құзыреттілік деңгейін арттыруға бағытталды.

Оқу курсына республиканың 18 өңірінен 92 АСК мүшесі қатысты. Семинар соңында тыңдаушыларға белгіленген үлгідегі сертификаттар берілді.

Осылайша, Орталық сайлау комиссиясы Электоралдық оқыту орталығы базасында тұрақты кәсіби негізде жұмыс істейтін барлық деңгейдегі 211 жаңадан сайланған АСК мүшелерін офлайн форматта оқытумен қамтыды.

Ақпарат көзі: Қазақстан Республикасы Орталық сайлау комиссиясы