Ақмола облысы әкімдігінде облыс әкімінің орынбасары Ернар Жаркешовтың, Германия Федеративтік Республикасының Қазақстан Республикасындағы Елшілігінің Тұрақты орынбасары Ульрих Кинне және Германияның халықаралық ынтымақтастық қоғамының (GIZ) өкілдерімен жұмыс кездесуі өтті.

Кездесу барысында Қазақстан мен Германия арасындағы ынтымақтастықты одан әрі нығайту перспективалары мен мүмкіндіктері талқыланды. Тараптар сауда-экономикалық және инвестициялық байланыстар, сондай-ақ жабдықтар мен құрамдас бөліктерді өзара жеткізу мәселелерін қарастырды. Ерекше назар білім беру бағдарламаларына: кәсіптік білімді дамыту, өңір экономикасының негізгі салалары үшін кадрлар даярлау және басқарудың озық тәжірибелерімен алмасу сынды өзекті мәселелерге аударылды.

Алғысөзде Ернар Жаркешов Ақмола облысының жетістіктері мен негізгі даму бағыттарын атап өтіп, өңірдің тұрақты даму саласындағы халықаралық жобалар үшін перспективалы серіктес екенін айтты.

GIZ өкілдері қалалардағы төмен көміртекті инфрақұрылымдық жобалар мен олардың қаржыландырылуы арасындағы алшақтықты қысқартуға бағытталған «Felicity 2» жобасын таныстырды. Пилоттық жоба Көкшетау қаласының Юбилейный шағын ауданында іске асырылуда.

Жоба аясында пәтер иелерімен өзара іс-қимыл бойынша шаралар өткізу жоспарлануда. IWO («Шығыс Еуропадағы тұрғын үй бастамасы») және Қазақстанның энергия тиімділігі саласындағы сарапшыларымен бірлесіп, көппәтерлі үйлердің энергия тиімділігін арттыру бойынша шешімдер әзірленеді.

Кездесу барысында тараптар өңірдің тұрақты дамуын қамтамасыз етуге және халықаралық ынтымақтастықты нығайтуға бағытталған бірлескен бастамаларды іске асыруға дайын екендерін білдірді. Жоспарланған жобалар заманауи технологияларды енгізу, энергия тиімділігін арттыру және қазіргі заманғы экономиканың талаптарына сай жоғары білікті кадрларды даярлау үшін негіз болмақ.

Ақпарат көзі: ГУ «Аппарат акима Акмолинской области»