ҚР Ғылым және жоғары білім министрлігі тіл саясатын тиімді іске асыру мәселелері бойынша республикалық семинар өткізді. Семинар Мемлекет басшысының Ұлттық құрылтайдағы «Әділетті Қазақстан – Адал азамат» атты екінші отырыста мемлекеттік тілдің рөлін күшейту және оны қолдану аясын, әсіресе ғылым мен білім беру саласында одан әрі кеңейту мүмкіндігін қарастыру бойынша берген тапсырмасын іске асыруға бағытталған.

  Ойталқыға ҚР ҒЖБМ Ғылым комитетінің Ақпараттық және есептеу технологиялары институтының бас директорының орынбасары, зертхана меңгерушісі, PhD, қауымдастырылған профессоры Өркен Мамырбаев, Ш.Шаяхметов атындағы «Тіл-Қазына» ұлттық ғылыми-практикалық орталығының Бас директоры Мақпал Жұмабай, Қ.Сәтбаев атындағы Қазақ ұлттық техникалық зерттеу университетінің аға оқытушысы, PhD, «Жас ғалым» жобасы бойынша жас ғалымдардың зерттеулерін гранттық қаржыландыру жобасының жеңімпазы Жансая Омарова қатысып, мемлекеттік тілдің қолданыс аясын кеңейту, қазақ тілін өздігінен оқып-үйренуге арналған ІТ-өнімдердің қолданысқа енгізу, қазақ тілінде сөйлеуді танитын жасанды интеллекті, креативті индустрия және қазақ тілін ғылым тілі ретінде дамыту мәселелеріне жан-жақты тоқталды.

  «AI&Нонотехнология» зертханасының ғылыми зерттеушісі, қазақ тіліндегі ең алғашқы жасанды интеллект туындылары «MIRASAI&SARAUEN» жобаларының авторы Алтынбек Мұратұлы (Бостон қаласы, АҚШ) онлайн режимде қазақ тіліндегі жасанды интеллектің музыкалық туындыларын кеңінен насихаттау жөніндегі құнды пікірлерімен бөлісті.

  Іс-шараның «Отан отбасынан басталады» деп аталатын екінші бөлімінде жас отбасы мүшелерімен кездесу болды. Отбасындағы мемлекеттік тілдің орны, оны ұрпақтан-ұрпаққа жалғастыру, ұлт ретінде сақталу, ұлттық кодты жаңғыртудың ең негізгі ошағы – отбасы тақырыбы қозғалды. Аталған шараға өңірлердегі тіл мәселесіне жауап беретін басқармалардың жауапты қызметкерлері, тілдерді оқыту орталықтарының өкілдері, жоғары оқу орындарының ғалымдары, ұлттық компаниялардың өкілдері, қазақ тілін жетік меңгерген этнос өкілдері және т.б. қатысты.

  Іс-шара соңында Тіл саясаты комитетінің басқарма басшысы Қайыржан Рахымжанов қатысушылар тарапынан келіп түскен сұрақтарға жауап берді. Сонымен қатар Ақмола облысының бір топ тіл жанашырлары, ғалымдары мен мемлекеттік қызметшілері қазақ тілінің қолданыс аясын кеңейтуге қосқан сүбелі үлесі үшін ҚР ҒЖБМ Тіл саясаты комитетінің Құрмет грамотасы және Алғыс хатымен марапатталды.

Ақпарат көзі: Қазақстан Республикасы Ғылым және жоғары білім министрлігі