Биылғы жылдың 23-28 қыркүйек аралығында Ақтөбедегі «Футбол академиясы» облыстық балалар-жасөспірімдер спорт мектебінде 10-18 жас аралығындағы жасөспірімдерге іріктеу жүргізілді. Жалпы 1100 бала тіркелген. Соның ішінде физикалық нормативтерді үздік тапсырып, жақсы ойын көрсеткен 600 бала іріктеліп алынды. 2015-2018 жылдары туған балаларға және 10-14 жас аралығындағы қабылдау әлі де жалғасуда.

«1 қазаннан бастап оқу-жаттығу процестері басталды. Оқу-жаттығу процестері бекітілген сабақ кестесіне сәйкес, таңғы 08:30-да басталып, ең соңғы оқу-жаттығулар 18:00-де аяқталады. Жаттығулар балалардың мектептегі ауысымына байланысты түске дейін және түстен кейін өткізіледі. Балалар жақсы көңіл-күйде», - деді «Футбол академиясы» облыстық балалар-жасөспірімдер спорт мектебі директорының орынбасары Әсемгүл Ешимова.

Сонымен қатар, балаға физикалық ауыртпалық көп түспеуі үшін жаттығулар дүйсенбі, сәрсенбі, жұма күндері және сәйсенбі, бейсенбі, сенбі күндеріне жоспарланды. Жексенбі – ойын күні. Балалар мен жасөспірімдер жас деңгейіне байланысты «алғашқы даярлық» және «оқу-жаттығу» топтарына бөлінген.

Жаттықтырушы-оқытушыларға қажетті спорттық инвентарьлар алынып, балалардың киім ауыстыратын бөлмелері қажетті жиһаздармен жабдықталған. Жаттығулар штаттық режімде өткізіліп жатыр.

Ақпарат көзі: ГУ «Акимат Актюбинской области»