Астана қаласындағы «Жастар» театрында Абай күніне арналған мәдени шараларды түйіндеу мақсатында «Абай аманаты» атты кеш өтті, деп хабарлайды елорда әкімдігінің ресми сайты.

Аталған кешті Астана қаласы әкімдігінің Тілдерді дамыту және архив ісі басқармасы ұйымдастырды. Ғұлама, ойшыл, ақын, ағартушы, қазақ әдебиетінің негізін қалаушы Абай Құнанбайұлының мұрасын ұлықтау мақсатында өткізілген бұл іс-шараға көрнекті абайтанушы ғалымдар мен қоғам қайраткерлері қатысты.

Олардың арасында Қазақстан Республикасының еңбек сіңірген қайраткерлері, Қазақстан эстрадасының жұлдызы Алтынай Жорабаева, «Құрмет» орденінің иегері Сүндет Байгожин, халықаралық байқаулардың лауреаты Ерлан Рысқали, ROYAL квартеті мен айтыскер ақын Мейірбек Сұлтанхан қатарлы талант иелерімен қатар «Жастар театры» ұжымы да бодды.Шығармашылық кешті Ұлттық аспаптар ансамблі музыкамен әрлеп отырды.

Аталған кештің шымылдығы «Бала Абай» бейнесюжетімен ашылып, «Жас Абай» бейнесюжеті мен «Дана Абай» бейнесюжеті көрсетілді. Сонымен қатар Абай әндері орындалды. Ал айтыскер ақын Мейірбек Сұлтанхан Абайға арнаған өлеңін айтып, көрермен көңілін көтерді. Сондай-ақ, кеш барысында «Жастар театры» ұжымының Абай – Тоғжан спектаклінен үзінді қойылды.

Ақпарат көзі: ГУ «Аппарат акима города Астана»