Қала әкімі денсаулық сақтау саласының қызметкерлерін келіп жеткен кәсіби мерекелерімен құттықтады       Бүгін Талдықорған қаласының әкімі Ернат Бәзіл қаламыздың денсаулық сақтау саласының қызметкерлерін келіп жеткен кәсіби мерекелерімен құттықтады.       Салтанатты шара шымылдығын қала әкімі ақжарма тілегімен ашып, денсаулық саласында қажырлы еңбек етіп жүрген сала майталмандарын құрмет және алғыс хатымен марапаттады.       «Құрметті денсаулық сақтау саласының қызметкерлері! Ардақты ақ халатты абзал жандар! Баршаңызды бүгінгі кәсіби мерекелеріңізбен шын жүректен құттықтаймын!       «Адамның басты байлығы – денсаулық» десек, барша жанның денсаулығын сақтауда Сіздердің үлестеріңіз зор.       Біздің мемлекетіміз үшін, адамның өмірін ұзарту, денсаулығын жақсарту басты міндет болып саналады. Сондықтан да, Сіздерге тек жақсылық, қызметтеріңізге табыс, отбасыларыңызға амандық тілеймін. Елдің алғысы мен ілтипатына бөлене беріңіздер!», - деді қала әкімі Ернат Бәзіл құттықтау тілегінде.       Мемлекет басшысы Қасым-Жомарт Кемелұлы: «Сапалы медициналық қызмет әрбір азамат үшін толық көлемде қолжетімді болуы керек!», - деген болатын.       Сондықтан елімізде медицина саласын дамытуға, мамандарға қолайлы жағдай жасауға ерекше көңіл бөлініп келеді.        Айта кеткен жөн, бүгінгі күні қаламызда 931 дәрігер, 3 мыңға жуық орта медицина қызметкерлері табысты еңбек етіп келеді.       Жиын қаламыздың өнерпаз қыз-жігіттерінің концерттік бағдарламасымен жалғасты.

Ақпарат көзі: ГУ «Аппарат Акима города Талдыкоргана»