Алматыдағы Армия үйінде әскери спортшылардың қатысуымен Олимпиада ойындарына арналған баспасөз конференциясы өтті.

Журналистермен кездесуді ҚР Қорғаныс министрлігі Спорт комитетінің төрағасы - Орталық спорт клубының бастығы полковник Арман Әбеуов және Париждегі Олимпиада ойындарынан оралған армия спортшылары–

Ғұсман Қырғызбаев, Ислам Сәтбаев, Нариман Құрбанов өткізді.

Полковник Арман Әбеуов спортшылардың ерекше шеберлік көрсеткенін атап өтті.

- Қазақстандықтар біздің жігіттердің өнерін үлкен қызығушылықпен әрі зор үмітпен тамашалады. Сіздер біз үшін мақтанышқа айналдыңыздар. Байрақты бәсекеде ел үмітін ақтап, жеңіс тұғырынан көріндіңіздер,  - деді Орталық спорт клубының бастығы медаль иегерлеріне сөйлеген сөзінде.

Естеріңізге сала кетейік, қатардағы жауынгер Ислам Сәтбаев аралас жұптар арасында 10 метрден пневматикалық тапаншадан оқ атуда қола медальді бірінші болып жеңіп алды. Одан кейін ОСК нұсқаушы-спортшысы дзюдошы, аға лейтенант Ғұсман Қырғызбаев 66 келіге дейінгі салмақ дәрежесінде еліміздің қоржынына қола медаль салды. ҚР Қарулы күштерінің қызметкері спортшы-нұсқаушы, гимнаст Нариман Құрбанов жеке есепте күміс медальға ие болды.

ОСК спортшылары қазақстандық олимпиадашылардың медальдық есебін толықтыруды жалғастыруда. ҚР Қорғаныс министрлігі Орталық спорт клубының спортшысы Демеу Жадыраев грек-рим күресінен Париж Олимпиадасының күміс медалін 77 келі салмақ дәрежесінде жеңіп алды.

Ақпарат көзі: Министерство обороны Республики Казахстан