Қорғаныс министрлігі Бітімгерлік операциялар орталығында «Орталық Азия және БҰҰ бітімгерлігі: ағымдағы қызмет және перспективалар» тақырыбында өңірлік дөңгелек үстел өтті.

БҰҰ-ның халықаралық бітімгерлер күніне орайластырылған іс-шара Қазақстан мен Тәжікстан қорғаныс ведомстволарының, Біріккен Ұлттар ұйымының, «БҰҰ-әйелдер» құрылымы кеңсесінің, Халықаралық Қызыл Крест комитетінің және отандық жоғары оқу орындарының өкілдерін жинады.

Отырысқа қатысушылар Орталық Азия елдерінің бейбітшілікті нығайту ісіне қосқан үлесін атап өтті, сондай-ақ халықаралық гуманитарлық құқық және бітімгерліктің гендерлік аспектілері мәселелерін талқылады.

Қорғаныс министрлігі Бітімгерлік операциялар орталығының бастығы полковник Бауыржан Нығметуллин бітімгерлік контингентін өз бетінше өрістету, әскери қызметшілерді бітімгерлік және тілдік дайындау тәжірибесін Орталық Азия елдеріндегі әріптестерімен бөлісуге дайын екенін жеткізді.

– Біз Орталық Азия елдерінің бітімгерлік әлеуетін күшейту аясында БҰҰ миссиялары үшін сарапшыларды дайындауда және бірлескен бастамаларды іске асыруда күш-жігерімізді біріктіре аламыз, – деп атап өтті ол.

Біріккен Ұлттар Ұйымының Нью-Йорктегі бас кеңсесінің Бітімгерлік операциялар департаментінің өкілі Герберт Лорэт Қазақстанның бітімгерлік операцияларға қатысу үшін өз контингенттерін жіберетін елдермен өзара іс-қимыл жасаудағы қызметін оң бағалады. Ол іс-шара Орталық Азия өңірінде білім мен тәжірибе алмасу, дайындық тұрғысынан серіктестік қарым-қатынас орнатуға ықпал ететініне сенім білдірді.

Бүгінде Бітімгерлік операциялар орталығы өңірдегі бірегей алаң бола отырып, әскери қызметшілерді БҰҰ миссияларына қатысуға оқыту мен дайындаудағы тәсілдерді жетілдіру мен түрлендіру бойынша үнемі жұмыс істеп келеді.

Орталық базасында әртүрлі елдердің тыңдаушыларының қатысуымен Біріккен Ұлттар Ұйымы сертификаттаған курстар өткізіліп тұрады. Университеттермен тығыз ынтымақтастықта халықаралық гуманитарлық құқықты зерделеу ұйымдастырылып, студенттерге бітімгерлік тақырыбы бойынша курстар өткізіледі.

Айта кету керек, Қазақстан БҰҰ-ның бітімгерлік операцияларына қатысу көкжиегін үнемі кеңейтіп келеді. Еліміз әскери қызметшілерді Непалдағы, Кот-д ' Ивуардағы және Малидегі БҰҰ миссияларына жіберді. Қазіргі уақытта біздің бітімгерлер Ливанда, Батыс Сахарада, Орталық Африка Республикасында және Конго Демократиялық Республикасындағы миссияларда қызмет етеді.

Сондай-ақ, БҰҰ-ның Голан жоталарындағы миссиясына алғашқы тәуелсіз бітімгерлік контингент орналастырылды. Бұл тарихи қадам еліміздің ынтымақтастыққа, бейбітшілік пен жаһандық қауіпсіздікті сақтауға деген ұмтылысын көрсетті.

Ақпарат көзі: Министерство обороны Республики Казахстан