1992 жылғы 4 маусымда Қазақстанның тәуелсіздігі мен бірегейлігін білдіретін Мемлекеттік рәміздері – Ту, Елтаңба және Әнұран алғаш рет бекітілді.

Мереке күні барлық әскери гарнизондарда мемлекеттілігіміздің мызғымастығын бейнелейтін Мемлекеттік Туды көтеруге арналған салтанатты рәсім өтті.

Әскери бөлімдерде мемлекет атрибуттарының тарихы мен мазмұны, авторлары мен маңызы туралы әңгімелейтін іс-шаралар ұйымдастырылды.

Радиоэлектроника және байланыс әскери-инженерлік институтындағы мерекелік іс-шарада Қазақстан Республикасының Мемлекеттік әнұраны орындалып, Ту мен Елтаңба шығарылды.

Әскери жоғары оқу орнының бастығы генерал-майор Қайрат Даутов мерекенің қазақстандық патриотизмді, азаматтықты және ел тарихына деген құрметті қалыптастырудағы маңыздылығын атап өтті.

–  Нағыз азамат елдің патриоты болуға, өз халқын сүюге және Отанының игілігі үшін бәрін жасауға тиіс. Күшті әрі өркендеген мемлекеттің болашағы әрқайсымыздың белсенді ұстанымымызға байланысты, – деп атап өтті ол.

Әскери оқу орнының курсанттары Алматы қаласы Әуезов ауданының әкімдігі ұйымдастырған Қазақстанның Мемлекеттік рәміздерін құрметтеу рәсіміне қатысты. Ту мен Елтаңба ортаға шығарылғаннан кейін олар аудан тұрғындарымен әнұран орындады.

Бүгін Гвардейск гарнизонындағы 21450 әскери бөлімінде мерзімді қызметтің үш сарбазы Медет Алтынбекұлы, Қайсар Рахманқұлов және Әділжан Нығмет туған күндерін атап өтуде.

Алматыда туып-өскен Қайсар Рахманқұлов Кәркен Ахметов атындағы республикалық спорт мектебінде оқыған. Жүзуден бірінші дәрежелі спортшы, бағдарламалаумен айналысады.

– Жақында ғана ант қабылдадым. Бүгін мен үшін қуанышты әрі айшықты оқиға болып тұр. Мен 4 маусымда дүниеге келдім. Елімізде бұл күн Мемлекеттік рәміздер күні. Дәл осы жерде менің әскери өмірім басталып, сенімім нығайды. Болашақта әскери оқу орнына түссем деген ниетім бар, – деді ол.

21450 әскери бөлімінің командирі подполковник Асхат Шайкенов сарбаздарды қос мерекемен құттықтап, оларға қызметтерінде сәттілік тіледі.

Ақпарат көзі: Министерство обороны Республики Казахстан