Ақтөбе облысының әкімі Асхат Шахаров өңірде әлеуметтік нысандарды салумен айналысып жүрген компаниялардың басшыларымен кездесіп, құрылыс жобаларының аяқталу мерзімдерін талқылады.

Құрылыс, сәулет және қала құрылысы басқармасының басшысы Ержан Мұздыбаев баяндамасында құрылысы ұзаққа созылған проблемалық нысандарға назар аударды. Атап айтқанда, Байғанин ауданының Оймауыт ауылындағы 150 орындық мектеп-балабақша, Мұғалжар ауданының Қандыағаш қаласындағы мектеп, Ақтөбедегі №51 мектеп-гимназиясының қоймасы, Темір ауданының Шұбарқұдық ауылындағы бассейн, Әйтеке би ауданының Әйке ауылындағы ангар типтегі спорт кешені және Шалқардағы фитнес-орталық.

Отырыс барысында өңір басшысы проблемалық объектілерді салып жатқан мердігерлердің әрқайсысын орындарынан тұрғызып, жұмыстардың кешеуілдеу себептерін сұрады.

Облыс әкімі «ARS BUILDING» ЖШС жұмысын қатты сынға алды. Компания 2021 жылы Қандыағаш қаласындағы Самал ықшам ауданында 600 орындық мектеп салу туралы жауапкершілік алған. Жоба бойынша жұмыстардың құны – 2,5 млрд. теңге. Арада үш жыл өтсе де, нәтиже көңіл көншітпейді. Мектеп әлі қолданысқа берілген жоқ. Айтып өтейік, былтыр Мұғалжар ауданына барған жұмыс сапарында Асхат Шахаров мердігермен кездескен еді, ол осы 2024 жылғы  оқу жылында білім ордасын тапсыру туралы уәдесін берді.

«Сіздермен 2023 жылдан бері бірнеше рет кездестік. Биыл мектептің құрылысын аяқтауға уәде бердіңіз. Жыл өтті, ештеңе өзгерген жоқ. Нысанның құрылысы әлі аяқталмады», - деді әкім мердігерге.

Әкім құрылыс, сәулет және қала құрылысы басқармасының басшысына құрылыс компаниясымен шартты бұзып, сотқа беруді тапсырды.

Отырыс барысында Асхат Шахаров мәдениет басқармасының басшысы мен қала әкіміне Қарғалы тұрғын алабында кітапхана құрылысының жобасын қайта қарауды тапсырып, жастарға арналған Coworking-орталық немесе халықтың бос уақытын тиімді өткізуге арналған басқа нысан салу керектігін атап өтті.

Сондай-ақ, су тасқынынан зардап шеккен ауылдарда бес білім беру нысанының құрылысын аяқтау, жақын арада Шилісайдағы мектепті тапсыру, жыл соңына дейін Есет батыр тұрғын алабында орналасқан өрт сөндіру депосын пайдалануға беру сияқты тапсырмалар берілді. Тағы бір ұзақ уақыттан бері салынып жатқан нысан – Хромтаудағы өрт сөндіру бөлімін мердігер 2025 жылы аяқтауы тиіс.

«Әрқайсысыңыз өз міндеттемелеріңізді нақты түсінулеріңіз шарт. Құрылыс кестесін сақтау маңызды. Біз жобалардың сапалы әрі уақытылы орындалуын қамтамасыз етуіміз керек. Жыл соңында компанияның әрбір басшысы өз сөздері үшін жауап береді. Енді ешқандай сылтау қабылданбайды», - деді облыс әкімі құрылыс компанияларының өкілдеріне.

Айтып өтейік, басқарма басшысының мәліметіне сүйенсек, 124 әлеуметтік нысанда құрылыс-монтаж жұмыстары жүргізілуде. Тағы 79 нысанға ЖСҚ әзірлену үстінде. Мектептер, ауруханалар, амбулаториялар, дене шынықтыру-сауықтыру кешені, мәдениет үйлері және басқа да әлеуметтік нысандар бой көтеріп жатыр.

Жалпы 203 жобаны іске асыруға Ұлттық қор және резервтен, облыстық бюджеттен 37,9 млрд. теңге бөлінді. Тоғыз айдың қорытындысына сәйкес, 42 нысан пайдалануға берілді, тағы 44 нысанның құрылысын жыл соңына дейін аяқтау жоспарлануда, қалған 38 нысанды 2025 жылы халық игілігіне беру жоспарланған.

Сонымен қатар, су тасқынынан зардап шеккен Мұғалжар және Ойыл аудандарының ауылдарында 5 білім беру нысаны бой көтеруде. Мәселен, Ойыл ауданы Ойыл ауылында 320 орындық және Мұғалжар ауданы Көтібар ауылында 60 орындық мектептер, сондай-ақ Мұғалжар ауданы Жағабұлақ ауылында және Ойыл ауданының Ойыл және Қаратал ауылдарында үш балабақшаның құрылысы қарқынды.

Ақпарат көзі: ГУ «Акимат Актюбинской области»