Елорданың коммуналдық қызметтері қар тазалау жұмыстарын тәулік бойы атқарып жатыр. Өткен түнде олардың күшімен полигондарға 21 мың текше метрден астам қар шығарылды, деп хабарлайды елорда әкімдігінің ресми сайты.

19 қарашадағы күндізгі ауысымда қар тазалау жұмыстарына 1 300-ден астам арнайы техника және 2 600-ден астам жол жұмысшысы жұмылдырылды.

18-19 қараша аралығында қар полигондарына 21 мың текше метрден астам қар 1 615 ауыр жүк көлігімен шығарылды.

Қыс мезгілінің басынан бері қаладан 463 мың текше метрден астам, 37 мыңға жуық рейс қар шығарылды.

Ережеге сәйкес, ең алдымен, қалада кептеліс болмас үшін өте қарқынды қозғалыс учаскелері тазаланады. Сондай-ақ орташа қарқындылығы бар учаскелер-алаңдар, вокзал маңы аумақтары, тротуарлар, әлеуметтік нысандарға кірме жолдар және т. б. орындар қардан тазартылады.

Орталық көшелерде, жолаушылар көлігі маршруттарында, аялдамалар мен тротуарларда тазалау басымдыққа ие.

Елордада бірнеше жабдықталған қар полигоны жұмыс істейді. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылған, жарықтандыру қосылған.

Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарлардан бас тартуды сұрайды.

Төтенше жағдай туындаған кезде "112" телефонына хабарласыңыз.

Ақпарат көзі: ГУ «Аппарат акима города Астана»