Бүгін Тәжікстан Республикасы Қаржы министрінің бірінші орынбасары Ю.Х. Маджидидің елімізге іссапары аясында Қазақстан мен Тәжікстан қаржы министрліктері арасындағы ынтымақтастық туралы меморандумды іске асыру жөніндегі өзара іс-қимылдың бірлескен іс-шаралар жоспарына қол қойды.

Құжатқа Қазақстан Республикасының Қаржы вице-министрі Д.М. Кеңбеил мен Тәжікстан Республикасы Қаржы министрінің бірінші орынбасары Ю.Х. Маджиди қол қойды.

Іс-шаралар жоспары мемлекеттік қаржы, мемлекеттік бюджетті басқару, мемлекеттік сатып алу, аудит, салықтық әкімшілендіру, рәсімдерді цифрландыру және т.б. салаларда ынтымақтастықты дамыту және тәжірибе алмасу туралы тармақтарды қамтиды.

Кездесу барысында Д.М. Кеңбеил мемлекеттер арасындағы қарым-қатынастың стратегиялық сипатын, сондай-ақ Қазақстан мен Тәжікстанның қаржы министрліктері арасында экономикалық байланысты нығайту және қаржылық ынтымақтастықты дамыту қажеттілігін атап өтті.

ҚР Қаржы министрлігі «Электрондық қаржы орталығы» АҚ алаңында мемлекеттік қаржы жүйесін цифрлы трансформациялау бойынша жобалармен таныстырғанын айта кетейік. «ЭҚО» АҚ Басқарма төрағасы Д.Қ. Крамшеев компанияның қызметі мен іске асырылып жатқан жобалар туралы, оның ішінде Мемлекеттік жоспарлаудың ақпараттық жүйесі, Бірыңғай сатып алу платформасы, Мемлекеттік электронды ішкі аудит, Онлайн бюджеттік мониторинг, Электрондық шот-фактуралар және Бірыңғай байланыс орталығының артықшылықтары туралы айтып берді.

ТР Қаржы министрінің бірінші орынбасары Ю.Х. Маджиди бастаған Тәжікстан Республикасының қаржы және білім министрліктері делегациясының сапары 11-13 қыркүйекке дейін жалғасады деп көзделген.

Ақпарат көзі: Министерство финансов Республики Казахстан