Қазақстан Республикасының төрағалығымен ҚР Ұлттық қорғаныс университетінде ҚХР-мен әскери саладағы сенімді нығайту және шекара аумағында қарулы күштерді өзара қысқарту туралы «Шанхай» және «Мәскеу» келісімдері шеңберінде бірлескен бақылау тобының кезекті сессиясы өтті.

Оның жұмысына Қазақстан, Қырғызстан, Ресей, Тәжікстан және Қытайдың дипломаттары мен әскери сарапшылары қатысты.   

Бірлескен бақылау тобының 46-сессиясына қатысушыларды қарсы ала отырып, Қазақстан Қорғаныс министрінің орынбасары генерал-майор Шайх-Хасан Жазықбаев бірнеше мемлекеттер арасындағы шекара маңындағы аудандарда өзара сенім мен ынтымақтастық ахуалын нығайтуға ықпал еткен келісімдердің рөлін атап өтті. 

– Уақыт Шанхай бестігінің тетігін құрудың құқықтық негізін қалаған әскери-саяси құжаттардың тарихи тұрғыда маңыздылығын көрсетті, ол өз кезегінде Шанхай Ынтымақтастық Ұйымы деп аталатын көпсалалы өзара іс-әрекеттің беделді халықаралық құрылымына айналды, – деді Қазақстан Қорғаныс министрінің орынбасары. 

Отырыста қатысушылардың келісімдерді орындауы, шекараның екі жағында 100 шақырым қауіпсіздік аймағында орналасқан Қарулы күштер мен Шекара қызметтерінің бөлімдері туралы ақпарат алмасу мәселелері қаралды. Осы жылдың екінші жартыжылдығына және 2025 жылға арналған өзара инспекциялар жоспары белгіленді.       

Тараптар келісімдердің іске асырылуына оң баға беріп, бірлескен бақылау тобының қызметі достық пен өзара сенімді нығайтуға айтарлықтай рөл атқаратынын, қауіпсіздік пен тұрақтылықты қамтамасыз ететінін, шекара маңындағы аудандардағы ынтымақтастық пен дамуға жәрдемдесетінін атап өтті. 

Одан өзге регламент бойынша ББТ-ның отырыстары жылына екі рет өткізілетінін айта кетелік. Көктемгі сессия – төрағалық етуші мемлекеттің астанасында, күзде – Қытайда өтетін болады.

Ақпарат көзі: Министерство обороны Республики Казахстан