Жұмысшы мамандықтары жылы аясында елордалық кәсіптік-техникалық колледжде ашық есік күні өтті. Іс-шара білім беру мекемесі мен қаладағы ірі жұмыс берушілер арасындағы серіктестікті нығайтуға ықпал етіп, студенттер үшін жаңа мүмкіндіктер ашты, деп хабарлайды Астана әкімдігінің ресми сайты.

Колледж 16 жылдан бері электр және газбен дәнекерлеуші, токарь, жол-құрылыс машинистері, техник-механик, электр маманы, жалпы құрылыс шебері, сондай-ақ автокөлік жөндеу слесарлары, жабдықтарды реттеуші, кран машинисі сияқты сұранысқа ие салалар бойынша жоғары білікті мамандарды дайындап келеді.

Іс-шара барысында колледждің «АЛКОН+» ЖШС және «Астана Тазалық» ЖШС сияқты компаниялармен ынтымақтастығына ерекше назар аударылды. Олар өз кәсіпорындарының қызметі мен студенттерге арналған мүмкіндіктері туралы айта отырып, теориялық білімді өндірістік тәжірибемен ұштастыратын дуальды оқытудың маңыздылығына тоқталды.«АЛКОН+» компаниясы қасбеттік дизайн саласына маманданған Астананың құрылыс саласында үлкен жетістікке жетті. Студенттер кәсіпорында тағылымдамадан өту барысында өз мамандығын меңгеріп қана қоймай, болашақ карьерасына пайдалы болатын практикалық дағдыларды үйренуге мүмкіндік алады.

Компанияның бас директоры Бейсен Жолболдиев кәсіптік-техникалық колледжімен ынтымақтастығы бірнеше жылдан бері жалғасып келе жатқанын және жақсы нәтиже беріп отырғанын айтты. Ол дуальды оқыту студенттерге білімдерін тереңдетіп, еңбек нарығында сұранысқа ие дағдыларды меңгеруге мүмкіндік беретінін баса айтты. «Жұмысшы мамандықтары» жылында компания студенттерге тәжірибе мен біліміне қосымша мүмкіндіктер ұсына отырып, колледбен ынтымақтастықты кеңейтуді жоспарлап отыр.

«Студенттер уақытының 65%-ға жуығын өндірісте өткізетін дуальді оқыту оларға теориялық бөлімді меңгеріп қана қоймай, табысты карьера үшін маңызды тәжірибе алуға көмектеседі. Біз жас мамандарды тартуға мүдделіміз және оларға тағылымдамадан өтуді ғана емес, оқуын аяқтаған соң жұмыс орнын да ұсынуға дайынбыз», - деді Бейсен Жолболдиев.

Іс-шарада өндірістік тәжірибеде жақсы нәтиже көрсеткен студенттер марапатталды. Олардың қатарында «Ғимараттар мен құрылыстарды салу және пайдалану» мамандығының 2-курс студенті Данияр Жақыпов пен «Электр жабдықтары» мамандығының студенті Әлихан Әбділманов бар. Екі студент те жоғары жетістіктері және практикалық жұмыстарға белсенді қатысқаны үшін «АЛКОН+» компаниясының алғыс хаттарына ие болды.

«АЛКОН+ компаниясындағы тағылымдама мені қатты қуантты. Колледжде алған теориялық білімімді жұмыс барысында қолдану маған ерекше әсер берді. Бұл тәжірибе мен үшін өте пайдалы болды, оның болашақ карьерама көмектесетініне сенімдімін», - дейді колледждің 2-курс студенті Данияр Жақыпов.

«Астана Тазалық» кәсіпорны да колледжбен белсенді ынтымақтастықта. Компания қаланы санитарлық тазалаумен айналысады. Компанияның HR менеджері Сымбат Хакімова жас мамандарды тартудың маңыздылығына тоқталып, компания студенттерге жұмысқа орналасу және кәсіби өсу үшін нақты мүмкіндіктер ұсынуға дайын екенін айтты.

«Біз студенттерді олардың санын шектемей, кез келген уақытта практикаға қабылдауға дайынбыз. Олардың нақты тәжірибе жинақтап, өз мамандығы бойынша дами алатыны маңызды. Ынтымақтастық өзара тиімділік әкелетініне және біздің компанияда жұмыс істегісі келетін мамандарды дайындауға көмектесетініне сенімдіміз», - деді Сымбат Кәкімов.

Іс-шара барысында студенттер компания өкілдеріне карьералық перспективалар мен кәсіби дағдыларға қойылатын талаптар туралы сұрақтарын қойды. Жұмыс барысын талқылау іс-шараның маңызды бөлігі болды және студенттерге болашақ жұмысында не күтіп тұрғанын білуге септігін тигізді.

Ақпарат көзі: ГУ «Аппарат акима города Астана»