ҚАЗҰУ ҒАЛЫМДАРЫ ЕЛДІҢ ОҢТҮСТІК ӨҢІРІНДЕ ДАЛАЛЫҚ ЗЕРТТЕУЛЕР ЖҮРГІЗДІ

  Әл-Фараби атындағы ҚазҰУ ғалымдары «Ауылдық жерлерді тұрақты дамытуды қамтамасыз ету үшін Қазақстанның оңтүстік өңірлерінде шөлейттену процестерінің алдын алуда табиғи-ауылшаруашылық жүйелерін (ТАЖ) орнықты басқаруды ғылыми-қолданбалы негіздеу» бағдарламасы бойынша ғылыми-зерттеу жұмыстарының шеңберінде егіншілік пен жайылымдық пайдаланудың табиғи егіншілік жүйелерінің жай-күйіне далалық зерттеулер жүргізді.

  Далалық экспедицияға География, жерге орналастыру және кадастр, Картография және геоинформатика, Биоалуантүрлілік және биологиялық ресурстар кафедраларының профессорлық-оқытушылық құрамы, сонымен қатар Ғарыштық технологиялар және Жерді қашықтықтан зондтау орталығының қызметкерлері қатысты.

  Негізгі бағыттардағы шөлейттену процестерінің дамуын бақылау бағдарламасына климаттың өзгеруімен күресуге бағытталған Тұрақты дамудың 13-ші мақсаты және жердегі экожүйелерді сақтауға бағытталған Тұрақты дамудың 15-ші мақсаты енгізілді.

  Экспедицияның негізгі міндеттері ауыл шаруашылығы және жайылымдық жерлерді пайдаланудың қазіргі жағдайын зерделеу, шөлейттену процестеріне ықпал ететін негізгі факторларды анықтау, сондай-ақ аумақтарды тұрақты басқару бойынша ғылыми-қолданбалы ұсыныстар әзірлеу болды.

  Ауыл шаруашылығы мен жайылымдық пайдалану үшін табиғи және антропогендік ТАЖ кешендерін қамтитын барлығы 96 негізгі бақылау нүктелеріне шолу жүргізілді.

  Далалық жұмыстарды жүргізу барысында барлық жоспарланған нүктелер қаралды. Бақылау нүктелерінде топырақ кескіндері арқылы сипаттау жүргізілді, топырақ үлгілері жинақталды, ұшқышсыз аппаратты қолдану арқылы ТАЖ сипаттамасы және өсімдік жамылғысының сипаттамасы жасалды. Кейбір бақылау нүктелерінде табиғи және жасанды (карьерлер) тау жыныстары зерттелді.

  Жерді қашықтықтан зондтау деректерімен салыстыру үшін бақылау нүктелерінде жетекші физикалық-географиялық және геоморфологиялық процестерге далалық талдау жүргізілді. Алдын ала далалық деректер ішінара өңделді және одан әрі үстел үстілі зерттеулері үшін мәліметтер базасы жасалып, топырақ үлгілері алынды.

Ақпарат көзі: Қазақстан Республикасы Ғылым және жоғары білім министрлігі