2024 жылғы 27 қыркүйекте Қазақстан Республикасы Энергетика министрлігінде атом саласы қызметкерлерінің кәсіби мерекесі күніне арналған салтанатты жиналыс өтті.

Іс-шараға Энергетика министрлігінің, «ҚР Ұлттық ядролық орталығы" РМК, «Ядролық физика институты» РМК, «Қазақстандық атом электр станциялар» ЖШС және «МАЭК» ЖШС, ҚР ҰКП «Атамекен» және салалық бірлестіктердің қызметкерлері қатысты.

Қазақстан Республикасының Энергетика министрі Алмасадам Сәтқалиев іс-шараға қатысушыларды құттықтап, кәсіби қызметіндегі жетістіктері үшін ведомстволық наградаларды табыс етті. Марапаттардың қатарында «Атом саласының үздігі» төс белгісі, Энергетика министрлігінің Құрмет грамоталары мен Алғыс хаттары бар.

Ведомство басшысы өз сөзінде атом саласының ел үшін маңыздылығын атап өтті: «Аталған мереке өз өмірін Қазақстан үшін стратегиялық маңызды салалардың бірін дамытуға арнаған адамдарды біріктіреді. Біздің жетістіктеріміз – саланың игілігі үшін жұмыс істейтін мыңдаған мамандардың еңбегінің нәтижесі. Ядролық технологиялар ел халқының өмір сүру сапасы мен денсаулығын жақсартуда шешуші рөл атқарады».

Министр сондай-ақ Қазақстанда атом электр станциясын салу мәселесі бойынша алдағы референдумның маңыздылығын атап өтіп, оны қоғам мен елдің энергетика секторы үшін басты тақырыптардың бірі деп атады.

Ақпарат көзі: Министерство энергетики Республики Казахстан