Витебск маңындағы «Лосвидо» оқу полигонында десантшылардың халықаралық дәрежедегі жыл сайынғы кәсіби сынақтары басталды. Оған Қазақстан Десанттық-шабуылдау әскерлерінің әскери қызметшілері екінші жыл қатарынан қатысып келеді. 

«Көгілдір береттердің» элиталық сынақтарының бірінші кезеңі жауынгерлік дайындықтың барлық пәндері бойынша білімді тексеруге, яғни теориялық емтиханға арналды. Билеттер тактикалық, атыс, медициналық, барлау, инженерлік, әуе-десанттық дайындық, әскери топография, РХБҚ, байланыс және басқа да саладағы сұрақтардан тұрды. 

Биылғы жылы нұсқаушылар жүзге жуық үміткердің білімін қатаң қадағалауда. Өйткені практикалық кезеңдерге теорияны «жақсы» және «өте жақсы» бағаға тапсырған әскери қызметшілер ғана жіберіледі.

Жазбаша сынақтардан кейін үміткерлер бірден әуе-десанттық дайындық нормативтерін орындауға кірісті. Сынақтың алғашқы кезеңінде барлау взводының командирі аға лейтенант Нұртуған Сазанбай үздік атанды.

Естеріңізге сала кетейік, «Ерлік пен шеберлік» төсбелгісін тағу құқығы үшін сынақтан өтудің негізгі мақсаты қатысушылардың кәсіби дағдыларын жетілдіру, әскери қызметшілердің дербес дайындық деңгейін, сондай-ақ олардың кез келген жағдайда барлау немесе арнайы міндеттерді орындауға дайындығын тексеру болып табылады.

Ақпарат көзі: Министерство обороны Республики Казахстан