ҚР Премьер-Министрінің орынбасары – ұлттық экономика министрі Нұрлан Байбазаров Азия инфрақұрылымдық инвестициялар банкінің (АИИБ) вице-президенті Константин Лимитовский бастаған делегация мүшелерімен кездесу өткізді. 

Диалог барысында қонақтарға еліміздегі қазіргі макроэкономикалық жағдай, инвестициялық ахуалды жақсарту бойынша атқарылып жатқан жұмыстар, инфрақұрылым мен өңдеу өнеркәсібі саласындағы жаңа бағдарламалар мен жобалар туралы ақпарат берілді. 

Банк қызметінің ерекшелігін ескере отырып, Қазақстанда көлік, энергетика, су және әлеуметтік инфрақұрылымды жаңғырту мен салуға бағытталған Үкіметтің бастамаларына ерекше назар аударылды. 

«Біз Азия инфрақұрылымдық инвестициялар банкімен одан әрі ынтымақтастықтың келешегін жоғары бағалаймыз. Қазақстанның жаңа инвестициялық циклге аяқ басып отырғанын әрі бүгінгі таңда халықаралық қаржы институттарымен қатар жеке инвесторларды да инвестициялық тұрғыдан қызықтыратын бірқатар ірі жобаларды ұсынып отырғанын атап өткім келеді»,

 

— деді вице-премьер. 

Константин Лимитовский Қазақстан АИИБ құрылтайшыларының бірі ретінде банкті құру мен дамытуда елеулі рөл атқарғанын атап өтті. Ынтымақтастықты кеңейтудің орасан зор әлеуетін мойындай отырып, АИИБ Қазақстанның Ұлттық даму жоспарын табысты жүзеге асыруға үлес қосуға, сондай-ақ 2060 жылға қарай көміртегі бейтараптығына қол жеткізу үшін декарбонизацияға деген ұмтылысын қолдауға дайын. 

АИИБ мен ҚР Ұлттық экономика министрлігі арасындағы кездесу аясында үш жылдық инвестициялық жоспарды бірлесіп әзірлеу ниеті туралы Декларацияға қол қойылды, ол ықтимал қаржыландыру үшін секторларды, салалар мен жобаларды көрсететін болады.

 

Ақпарат көзі: Министерство национальной экономики Республики Казахстан