Алдағы екі айда Солтүстік-Батыс ауыл шаруашылығы және орман шаруашылығы университетінің (NWAFU) магистранттары Қостанай университетінде тағылымдамадан өтеді.

Baitursynuly University ректоры Сейтбек Қуанышбаев Feng Longting, Tang Zhongyan, Wu Yajun және Chen Jin-мен танысып, университет тарапынан барлық жағдай жасалатынын атап өтті. Магистранттар өздерін жылы қабылдағаны үшін алғыстарын білдіріп, оқу корпустарымен, студенттермен және оқытушылармен танысты.

Естеріңізге сала кетейік, өткен жылдан бері Ахмет Байтұрсынұлы атындағы Қостанай өңірлік университеті мен Қытай жоғары оқу орнымен ынтымақтастық қарым-қатынас орнаған. Қазір бірлескен жоба аясында Қостанайда ҚХР-дан әкелінген элиталық дақылдар сорттық сынамадан өткізіліп жатыр.

Алдағы оқу жылында екі жақтың білім ордалары академиялық ұтқырлық шеңберінде студенттер алмасуды жолға қоюды және «Агрономия» мамандығы бойынша қос дипломға оқыту бағдарламасын іске асыруды жоспарлап отыр.

Ақпарат көзі: Қазақстан Республикасы Ғылым және жоғары білім министрлігі