Елордада «AMANAT» партиясының Астана қалалық филалының ұйымдастырумен «Баланы мектепке даярлайық!» қайырымдылық акциясы өтті, деп хабарлайды қала әкімдігінің ресми сайты.

Акция аясында елордалық 60-қа жуық отбасыға мектеп сөмкелері мен кеңсе тауарлары үлестірілді.

Іс-шараға «AMANAT» партиясы Астана қалалық филиалының атқарушы хатшысы Мұхаммед Болысбек, елордалық мәслихат депутаты Мәдина Әжікенова, саяси партияның аудандық хатшылары, астаналық ата-аналар мен оқушылар қатысты.

«2014 жылдан бері дәстүрлі түрде партияның «Бақытты отбасы» жобасы жүзеге асып келеді. Аталған жоба негізінде «Баланы мектепке даярлайық!» қайырымдылық акциясы қатар өткізілуде. Сұранысы көп жобаға қатысу үшін «AMANAT» партиясы Астана қалалық филиалына 1250 өтініш келіп түссе, бүгінде 750 отбасыға қолдау көрсетіледі. Еліміздің барлық өңірін қамтыған жобаның маңызы мен мәні зор. Халықтың әлеуметтік осал тобынан шыққан балалардың оқуға бастар қадамы қуанышқа толы болуы үшін оларды мектепке даярлап, жан-жақты көмек көрсету ісінде әркім азаматтық белсенділік танытатынына сенімдімін. Салауатты, сәтті әрі бақытты өмір негізі балалық шақта қаланады. Балалардың дамуына қолдау көрсету – қоғамның басты мақсаты», - деді өз сөзінде «AMANAT» партиясы Астана қалалық филиалының атқарушы хатшысы Мұхаммед Болысбек.

Қайырымдылық акциясы аясында әлеуметтік осал топтан шыққан бастауыш сынып оқушыларына басымдық берілді. Осылайша, демеушілер мен қайырымды жандардың қолдауының арқасында оқушылардың жаңа оқу жылы дайындығына көмек көрсетілді.

Акцияда балаларына сөмке алған елордалық тұрғын әрі көпбалалы ана Гүлнар Ақтаева ұйымдастырушыларға алғысын білдірді.

«Менің төрт балам бар. Оның екеуі – мектеп жасында. Балаларыма екінші жыл қатарынан екі мектеп сөмкесі мен керек-жарағын алып келемін. Акцияға қатысу үшін арнайы өтініш жазып, қабылдандым. Қазірде екі баланың мектеп сөмкесі мен кеңсе тауарын сатып алудың өзінде кемі 80 мың теңге қаржы жұмсалады. Сондықтан «AMANAT» партиясы ұйымдастырған акцияның қолдауы көп. Білім күні қарсаңында жаңа құрал-жабдықтарды алғанына балаларым мәз, мектепке қуана баратын болды. Ұйымдастырушыларға алғысымды білідіре отырып, жоба жалғасын таба берсе екен деймін», - деді Г.Ақтаева.

Естеріңізге сала кетейік, 1 тамыздан 30 қыркүйекке дейін аз қамтылған, көп балалы отбасылар, жетім балалар және ата-анасының қамқорлығынсыз қалған балалар қатарындағы білім алушыларға «Мектепке жол» республикалық акциясы аясында демеушілік қаражаты есебінен керек-жарақтары бар мектеп рюкзактары түрінде көмек көрсетіледі. Барлығы 8 500-ден астам баланы қамту жоспарлануда.

Бұл акцияның мақсаты аз қамтылған, көп балалы отбасылар, жетім балалар және жаңа оқу жылының басталуына дайындық кезеңінде ата-анасының қамқорлығынсыз қалған балалар қатарындағы білім алушыларға материалдық көмек көрсету және әлеуметтік себептер бойынша балалардың мектепке бармауының алдын алу болып саналады.

Ақпарат көзі: ГУ «Аппарат акима города Астана»