Жетісу облысында агроөнеркәсіптік саланы дамыту мақсатында инвестициялық жобалар пулы қалыптастырылды. 2024-2026 жылдары 33 млрд. теңгеден астам сомаға 31 жобаны, соның ішінде қайта өңдеу, мал шаруашылығын дамыту, жылыжай шаруашылығы, бау-бақша және ылғал үнемдеу технологиялары саласында жобаларды іске асыру жоспарланған, - деп хабарлады облыс әкімінің баспасөз қызметі.

Облыстық ауыл шаруашылығы басқармасының деректері бойынша биыл өңірде сүт және ет бағыттарын одан әрі дамыту, сондай-ақ ылғал үнемдейтін технологияларды қолдану аясын кеңейту мақсатында жалпы құны 13,1 млрд. теңге болатын 13 жобаны іске қосу жоспарланған.

«Соның ішінде «Ірі жобалар» бағдарламасы аясында 2023 жылы республикалық бюджеттен 2 млрд. теңге бөлінді. Үш тауарлы сүт фермасы іріктеуден өтіп, кеңейту жүргізуде. Осы жылға бағдарлама шеңберінде 7 млрд. теңге бөлінді, сенім білдірілген агент ретінде «Жетісу» ӘКК анықталды. Бүгінгі таңда ылғал үнемдейтін технологияларды енгізу бойынша 1,8 млрд. теңгеге 3 өтінім қабылданды. Бүгінгі таңда өтінімдерді қабылдау жалғасуда. Бөлінген қаражатқа су үнемдеу бойынша 5 жобаны іске қосу және бордақылау алаңын іске қосу жоспарлануда», - делінген басқарма хабарламасында.

«Ауыл аманаты» бағдарламасына келетін болсақ, биыл өңірге 2,8 млрд.теңгеден астам қаржы бөлінді. Осы қаражат есебінен 440 жеңілдікті несие беру, 760 жұмыс орнын ашу, 8 кооператив құру жоспарлануда. Осы жылдың 10 маусымындағы жағдай бойынша, 1235,6 млн. теңгеге 172 өтінім мақұлданды.

Атап өтсек, Жетісу облысында қазіргі кезде 26 мың басқа арналған 71 бордақылау алаңы және 8,2 мың басқа арналған 36 сүт фермасы, сондай-ақ қуаттылығы жылына 380 млн. дана жұмыртқа өндіретін «Көгер ЛТД» ЖШС құс фабрикасы жұмыс істейді. Жыл басынан бері 30,2 мың тонна ет, 87,9 мың тонна сүт, 105,9 млн. дана жұмыртқа өндірілді. Бұдан басқа, өңірде ауыл шаруашылығы өнімдерін қайта өңдеу бойынша 122 кәсіпорын жұмыс істейді, олар 4 айда 22,5 млрд. теңге сомасына тамақ өнімдерін шығарған. Бұл ретте табиғи түрде ет өнімдерін шығару 5%-ға, өсімдік майы 11%-ға, крахмал 56,8%-ға, нан өндірісі 10,2%-ға, ал кондитерлік өнімдер 27,6%-ға ұлғайтылды.

Жетісу облысы әкімінің баспасөз қызметі

Фотосуреттер Жетісу облысы әкімі баспасөз қызметінің архивінен алынды.

Ақпарат көзі: Жетісу облысының әкімдігі