Астанада жыл сайын 1 500 – 2 000 қала тұрғыны қазақ тілін тегін оқиды. Оның 40 пайызы өзге этнос өкілдері. Ал 110 мемлекеттік қызметші ағылшын тілін оқу курсына қатысады. Бұл туралы Астана қаласының Тілдерді дамыту және архив ісі басқармасының басшысы Сәкен Есіркеп Коммуникациялар қызметінде өткен брифингте мәлім етті, деп хабарлайды елорда әкімдігінің ресми сайты.

Басқарма басшысының айтуынша, қазақ және ағылшын тілінде сөйлесу клубтары жұмыс істейді. Оған көбінесе өзге этнос өкілдері шақырылады.

Бұдан бөлек кәсіпкерлерге арналған интенсив қазақша курстар бар. Қаладағы біраз кәсіпкер, сатушылар, қызмет көрсетуші персоналдар оқып келеді.

Қазіргі уақытта әртүрлі сала мамандарына қажетті Аударма сөздіктер дайындалып шықты. Электрондық форматта Атамекен арқылы кәсіпкерлерге таратылуда.

Ведомство басшысы сол сияқты танымал мотиваторлар мен тіл жанашырларын тарта отырып, балабақша және мектептерде ата-аналармен, мұғалімдермен және тәрбиешілермен кездесулер сериясы жүйелі түрде өтетінін айтты.

«Былтыр және биыл осы кездесулерге Оразкүл Асанғазы, Тұрар Саттарқызы, Қазыбек Иса, Аманжол Әлтаев, Дәулеткерей Кәпұлы, Дархан Мыңбай, Света Айтбаева т.б. азаматтар тартылды. Жыл сайынғы кездесулер саны 200-ден асады.

Астана қаласындағы зиялы қауыммен жұмысқа негізгі жауапты біздің басқарма саналады. Қаладағы 180 ақын-жазушы мен белгілі мемлекет және қоғам қайраткерлерімен тұрақты байланыс орнатылған», – деді Сәкен Есіркеп.

Ақпарат көзі: ГУ «Аппарат акима города Астана»