Конституциялық Сот шешімдерінің Сот жүйесін реформалау туралы заңда орындалуы
Конституциялық Сот шешімдерінің Сот жүйесін реформалау туралы заңда орындалуы
Телеграмм КС - https://t.me/consot_kz
Мемлекет басшысы а.ж. 21 қарашасында «Қазақстан Республикасының кейбір заңнамалық актілеріне сот жүйесін реформалау және процестік заңнаманы жетілдіру мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды.
Заңдағы негізгі өзгеріс төменгі сатыдағы соттардың шешімдеріне шағымдарды қарайтын тәуелсіз кассациялық соттарды енгізу болып табылады.
Заң Конституциялық Соттың қорытынды шешімдерін іске асыруға бағытталған бірқатар түзетулерді қамтиды.
Атап айтқанда, Конституциялық Сот 2023 жылғы 16 мамырдағы №13-НҚ қорытынды шешімінде заңды күшіне енген сот актілерін қайта қарау туралы өтінішхатты қарау кезінде кассациялық сатының қылмыстық іс материалдарын талап етуге міндетті екенін көрсетті.
Заңмен Қылмыстық-процестік кодекстiң 492-бабының бірінші бөлігіне өзгерістер енгізілді, оған сәйкес кассациялық сатыдағы сот кассациялық шағым келіп түскеннен кейін қылмыстық істі тиісті соттан талап етіп алдырады.
Конституциялық Соттың 2023 жылғы 14 шілдедегі №21-НҚ нормативтік қаулысында қылмыстық құқық бұзушылық түріне және қылмыстар санатына қарамастан кассациялық сатыға қол жеткізуді қамтамасыз ету қажеттігі көрсетілген.
Заңмен ҚПК-нің 484-бабына өзгерістер енгізілді, оған сәйкес кассациялық сот кассациялық шағымдар бойынша сот бұйрықтық, келісімдік іс жүргізуде немесе ҚПК-нің 382-бабында көзделген тəртіппен қараған қылмыстық құқық бұзушылықтар туралы істер бойынша сот актілерін қоспағанда, қылмыстық құқық бұзушылық түріне және қылмыстар санатына қарамастан істерді қарайды.
Конституциялық Сот 2023 жылғы 22 ақпандағы №3 нормативтік қаулысында сот төрелігіне қолжетімділік – құқықтық мемлекеттің адамға қандай да бір негізделмеген кедергілерсіз сотқа өтініш берудің нақты мүмкіндігіне кепілдік беретін іргелі қағидаты сот арқылы қорғалу құқығының маңызды элементі болып табылатынын атап өтті.
Конституциялық Соттың құқықтық ұстанымдарын ескере отырып, Заң Азаматтық процестік кодекстің 434-бабы екінші бөлігінің 3) тармақшасын алып тастады, оған сәйкес талап қою сомасы екі мың айлық есептік көрсеткіштен кем болған кезде жеке тұлғалардың және талап қою сомасы отыз мың айлық есептік көрсеткіштен кем болған кезде заңды тұлғалардың мүліктік мүдделеріне байланысты істер бойынша сот актiлері кассациялық тәртiппен қайта қаралуға жатпайды.
Ақпарат көзі:
Біздің Telegram арнамызға жазылыңыз және барлық маңызды оқиғалардан хабардар болыңыз, мына сілтеме -
