Атырау облысынан тұрақты орналасу пункттеріне 400-ден аса Отан қорғаушы оралды. Олардың арасында танк және артиллериялық бригадалардың әскери қызметшілері, сондай-ақ әскери дәрігерлер бар.

Гарнизонның жеке құрамы Атырау облысының Ақжар, Ақсай, Алмалы, Бесікті, Жаңаталап, Талқайран елді мекендері маңындағы су тасқынына қарсы іс-шараларға тартылған болатын.

Қорғанысты қамтамасыз ету үшін әскери қызметшілер құм толтырылған қаптармен кедергілер жасады. Олар жалпы ұзындығы жүз шақырымнан асатын жерге тосқауыл қойып, тасқын судың бетін қайтарды.

Ол үшін 800 мыңнан астам қап құм дайындалып, төселді. Сондай-ақ, аймақта су тасқынынан зардап шеккен жергілікті тұрғындарға және қажет болған жағдайда әскери қызметшілерге білікті көмек көрсететін әскери дәрігерлер тобы да жұмыс істеді.

Іссапардан оралған жауынгерлерді Гвардейск гарнизонының бастығы полковник Ержан Мейірманов қарсы алды.

– Күрделі жағдайда тәуекелге бел шешіп, бір ұжымда су тасқынына қарсы күресте жанқиярлық көрсете білдіңіздер. Сол үшін сіздерге шын жүректен алғыс айтамын, – деді ол.

Еңбегімен ерекше көзге түскен әскери қызметшілер грамоталармен және алғыс хаттармен марапатталып, 10 күндік демалыс берілді.

Ақпарат көзі: Министерство обороны Республики Казахстан