Астана қаласында Astana Finance Days 2024 аясында Халықаралық төрелік орталығы (ХТО) ұйымдастырған «Төреліктегі әйелдер күні» шарасы өтті.

Шара халықаралық төреліктің негізгі аспектілерін талқылау және пікір алмасу үшін, сондай-ақ заң кәсібіндегі әртүрлілік пен инклюзивтіліктің маңыздылығына назар аудару мақсатында Қазақстанның, Өзбекстанның, Ресейдің, Ұлыбританияның, Германияның және Қытайдың жетекші әйел төрешілерін, ғалымдары мен заңгерлерін біріктірді.

Конституциялық Сот судьясы Айгүл Қыдырбаева өз сөзінде Конституциялық Сот құрылғаннан бері теңдік, әділеттілік және адамның қадір-қасиетін құрметтеу саясатын алға тартып келе жатқанын атап өтті. Судья Конституциялық Соттың кадр саясаты мен қабылданған шешімдер органның кемсітпеу және жынысына қарамастан барлығына тең құқықтар мен мүмкіндіктерді қамтамасыз ету қағидаттарына берік екендігіне сенім білдірді.

Шара инклюзивтілік мәселелерін талқылау және әйелдердің халықаралық төреліктегі рөлін арттыру үшін маңызды алаңға айналды, бұл жаһандық деңгейде сот төрелігін одан әрі дамытуға ықпал етеді.

Еске салайық, Халықаралық төрелік орталығы АХҚО-да азаматтық және коммерциялық дауларды шешу үшін сот ісін жүргізуге тәуелсіз, үнемді және жедел балама ұсынады. Төрелік және медиация рәсімдері бойынша төрешілер мен медиаторларды тағайындауға көмек көрсетеді. Оның 53 халықаралық төрешілер мен медиаторлардан тұратын жеке құрамы бар. Осы уақыт ішінде олар 3159 төрелік және медиация рәсімдерін қарады.

Ақпарат көзі: Қазақстан Республикасының Конституциялық Соты