Десанттық-шабуылдау әскерлеріндегі бөлімшелердің қарқынды дайындығы жауынгерлік атыстармен аяқталды.

Практикалық сабақтар Алматы, Қонаев және Жетісу гарнизондарындағы барлық оқу полигондарында ұйымдастырылды. Үш күн ішінде әскери қызметшілер дала жағдайында машықтанып, бөлімшелердің үйлесімділігін жетілдірді. Атыстар күндізгі және түнгі уақытта жауынгерлік жағдайға барынша жақын жағдайда жүргізілуде.

Райымбек батыр атындағы Алматы десанттық-шабуылдау бригадасының әскери қызметшілері «Іле» оқу орталығында жаттығу қимылдарын жүргізу дағдыларын пысықтады. Жауынгерлік атыстардың алдында екі апталық дайындық болып, оның барысында мерзімді қызмет сарбаздары атыстың қарапайымнан күрделі түріне дейін, тактикалық және арнайы дайындық бойынша нормативтерді пысықтаған болатын. Одан бөлек әртүрлі жағдайларда жауынгерлік тапсырманы орындау әдістері мен тәсілдерін үйренді.

 – Бөлімшелерді дайындау барысында әрбір әскери қызметші бөлімшедегі өз орнын, өз рөлі мен міндеттерін жете түсінген. Жауынгерлік атыс кезеңінде жеке құрам бір-бірін бірден түсініп, біртұтас механизм ретінде әрекет етеді, - дейді 61993 әскери бөлімі десанттық-шабуылдау ротасының командирі аға лейтенант Әлішер Еденов.

Бірақ жауынгерлік дайындық кезінде басты рөл командирлерді оқытуға бағытталды. Олар қажет кезде шешім қабылдап, әр жауынгердің мақсаттары мен міндеттерін анықтайды және жеке құрамның әрекеттерін үйлестіруге жауап береді. Бұған қоса жауынгерлік тапсырманың орындалуын бақылайды.

Бөлімшелерді дайындау барысында командирлер жауынгерлік іс-қимылдарды сауатты жоспарлауды, жауынгерлік атыс жоспарларын әзірлеуді, жер бедері, ауа райы жағдайлары және жауынгерлік тапсырмалар сияқты әртүрлі факторларды ескеруді үйренеді. Олар ұрыс алаңындағы жағдайды тез және дәл бағалау, шектеулі уақыт жағдайында шешім қабылдау дағдыларын жетілдіреді. Жазғы оқу кезеңінде десанттық-шабуылдау әскерлерінде барлығы 500-ден астам бөлімше дайындығы жоспарланған. Бөлімшелердің жауынгерлік атыстары бөлімшелердің білімі мен ұйымшылдығын жетілдіру мақсатында жүргізіледі және оларды жауынгерлік үйлестірудің соңғы кезеңі болып табылады.

Ақпарат көзі: Министерство обороны Республики Казахстан