Сенім мен қауіпсіздікті нығайту шаралары туралы 2011 жылғы Вена құжаты аясында Чехия, Испания және Словакия әскери қызметшілерінен тұратын инспекциялық топ «көрсетілген ауданға» инспекция жасады.

Тексерістің міндетіне «көрсетілген ауданда» Вена құжатының ережелеріне сәйкес, алдын ала хабарлауды қажет ететін көлемді әскери оқу-жаттығулардың болу-болмау фактісін тексеру кіреді.

Әскери сарапшылар армиялық авиацияның тікұшағымен Семей, Аягөз және Өскемен гарнизондарының әскери бөлімдері кіретін «көрсетілген ауданды» әуеден тексерді. Инспекциялық топ үшін бөлім қолбасшылығы брифингтер ұйымдастырды.

Тексеру жыл сайынғы әскери ақпарат алмасу шеңберінде бұрын жіберілген мәліметтердің сәйкестігін растады. Әскери сарапшылар Қазақстанның 2011 жылғы Вена құжаты шеңберінде халықаралық міндеттемелерді толық орындағанын атап өтті.

Инспекция өзара түсіністік пен ашық жағдайда өтті. Шетелдік мамандар Қару-жарақты бақылау орталығының ілеспе тобы мен әскери бөлімдердің қолбасшылығына инспекциялық топтың жұмысын жоғары деңгейде ұйымдастырғаны үшін ризашылықтарын білдірді.

Ақпарат көзі: Министерство обороны Республики Казахстан