ҚР Сауда және интеграция вице-министрі Қайрат Төребаев Астанада өткен 19-шы Қазақстан-Қытай жәрмеңкесінің ашылуында баяндама жасады. 

Өз сөзінде Қайрат Төребаев жәрмеңкенің екі елдің экономикалық өміріндегі басты оқиға ретіндегі маңыздылығын атап өтті. 2003 жылдан бастап бұл іс-шара Қазақстан мен Қытай арасындағы сауда-экономикалық байланыстарды нығайтуға арналған алаңға айналды. Биылғы жылы жәрмеңкеге Шыңжаң-Ұйғыр автономиялық ауданы, Чжэцзян, Цзянсу, Шаньдун, Гуандун сияқты провинциялардан, сондай-ақ Шанхай мен Тяньцзинь қалаларынан келген 250-ге жуық қытайлық компания қатысты. 

Вице-министр Қайрат Төребаев қазақстандық компаниялардың халықаралық көрмелерге қатысуы сауда байланыстарын нығайтуға және экспорттық келісімшарттарға қол жеткізуге  ықпал ететінін айтты. Ол сондай-ақ көрме Қазақстан мен Қытай бизнес қауымдастығы арасында нәтижелі диалог пен жаңа іскерлік байланыстар алаңына айналатынына сенім білдірді. 

«Біз жыл сайын Шанхайдағы Қытай халықаралық импорт көрмесіне қатысамыз. Соңғы 6 жылда Қазақстаннан 163 компания қатысты. Олар жалпы сомасы 323 миллион АҚШ долларынан асатын экспорттық келісімшарттарға қол қойды. Сондай-ақ біз екі жыл қатарынан Үрімшіде өткен ЭКСПО-Қытай Еуразия көрмесіне қатысып келеміз, онда соңғы екі жылда 80 қазақстандық компания 80 миллион АҚШ долларына келісімшарттар жасасты», - деді Қайрат Төребаев өз сөзінде.

Ақпарат көзі: Министерство торговли и интеграции Республики Казахстан