Конституциялық Сот судьясы Роман Подопригора мен Конституциялық Сот Аппараты бөлімінің меңгерушісі Салтанат Нұрымбетова 19-21 тамыз аралығында Еуропалық Одақтың қаржылық қолдауымен Алматыда «Құқықтық саясатты зерттеу орталығы» қоғамдық қоры және адам құқықтары жөніндегі халықаралық әріптестік ұйымдастырған құқық үстемдігі академиясында сөз сөйледі.

Шараға Қазақстанның 13 өңірінен 27 азаматтық қоғам ұйымынан 42 өкіл қатысты. Қатысушылар адам құқықтарын, балалардың, әйелдердің, жастардың, мигранттардың, мүгедектердің және басқа да осал топтардың құқықтарын қорғауға маманданған.

Академияның мақсаты – Қазақстандағы азаматтық қоғам өкілдерінің құқықтық сауаттылығын арттыру және құзыреттерін нығайту. Бағдарлама құқық үстемдігінің негізгі аспектілерін, тәуелсіз сот жүйесінің рөлін, қылмыстық сот төрелігін, әкімшілік әділеттілікті, адам құқықтарының бұзылуын құжаттауды және стратегиялық сот ісін жүргізуді зерттеуді қамтыды.

Роман Подопригора ұлттық конституциялық бақылау органының миссиясы туралы егжей-тегжейлі айтып, оның негізгі қызметі – заңнаманың Негізгі Заңға сәйкестігін тексеруге тоқталды. Сондай-ақ ол азаматтардың Конституциялық Cотқа қандай жағдайларда шағымдануға болатынын және апелляциялық шағым беру кезінде қандай ресми және мазмұнды талаптар сақталуы керектігін түсіндірді.

Телеграмм КС -

Ақпарат көзі: Қазақстан Республикасының Конституциялық Соты