Елордада Қазақстан Республикасы Ұлттық ұланының 3656 әскери бөлімінің құрылғанына 32 жыл толуына арналған салтанатты іс-шара өтті.

Отан қорғаушылар күні мен Ұлы Отан соғысындағы Жеңіс күні қарсаңында оның ашылу салтанатына Қазақстан Республикасы Қарулы Күштерінің Жоғарғы Бас Қолбасшысы – Қазақстан Республикасының Президенті Қасым-Жомарт Тоқаев қатысқан болатын. Іс-шарада Қазақстан Республикасы Ішкі істер министрінің орынбасары – Ұлттық ұланның Бас қолбасшысы Еркін Ботақанов құттықтау сөз сөйледі.

– Бүгінде әскердің авиациясын қызметтік-жауынгерлік бағытта қолдану спектрі бірнеше есеге ұлғайды. Ұлттық ұлан авиациясының алдында тұрған міндеттерді 3656 әскери бөлімінің жеке құрамы толық көлемде орындап жатыр. Бұл “Өзара іс-қимыл”, “Кобальт”, “Террорға қарсы” халықаралық оқу-жаттығулары кезінде, ел ішінде ұйымдасқан қылмысқа және есірткі бизнесіне қарсы күрес жөніндегі “Канал”, “Қарасора” арнайы операцияларын жүргізу барысында, сондай-ақ қазақстандық ұшқыштар батылдық пен кәсібилік танытқан Сирия, Түркия және Ауғанстан елдеріне гуманитарлық көмек жеткізу жөніндегі халықаралық миссияларды орындау уақыттарында дәлелденді.

Сәуір айында ҰҚК Қарулы Күштерінің, ҚР ІІМ Ұлттық ұланының, Шекара қызметінің бөлімшелері құтқарушылармен және полицейлермен бірге біздің азаматтарымызды көктемгі су тасқынынан құтқаруға белсенді қатысып, елді мекендерде құқықтық тәртіпті қамтамасыз етті. Бұрын-соңды болмаған элементтермен күресу үшін әскери авиация да тартылды. Олар қатынассыз қалған аудан тұрғындарын эвакуациялап, гуманитарлық жүктерді халыққа жеткізді. Осы қиын күндерде азаматтарымызға көмек көрсеткен 3656 әскери бөлімінің әскери қызметшілеріне зор алғысымды білдіремін. Қазіргі уақытта авиацияда сенімді ұшақтар мен тікұшақтар бар, олар 4 мың км-ден астам қашықтыққа тоқтаусыз ұшуға және бір уақытта 20 тоннаға дейін жүк тасымалдауға мүмкіндік береді. Тағы үш Y-8 ұшағын сатып алу жоспарда бар, – деді Еркін Ботақанов.

ҚР Ішкі істер министрінің орынбасары Айдар Сайтбеков құқықтық тәртіп әскерлерінің бұрынғы қолбасшысы Болат Жанасаев, сондай-ақ “Квинтек” компаниясының директорлар кеңесінің төрағасы Айк Согоян және 3656 әскери бөлімінің ардагер-ұшқышы Сағадат Байбахтиев жылы лебіздері мен қошеметтерін білдірді.

– Тәуелсіздік жылдарында Ұлттық ұланның 3656 әскери бөлімінің жеке құрамы ішкі істер органдарының конституциялық құрылысты қорғау және елдің қауіпсіздігін қамтамасыз ету жөніндегі ең күрделі міндеттерін орындауға қабілетті, сенімді және тиімді құрылым екенін көрсетті. Сонымен қатар сіздер аға буын ісін жалғап, Талғат Бигелдинов, Нүркен Әбдіров сияқты ержүрек батырлар мен даңқты ата-бабалардың жолын абыроймен жалғастырып келесіздер. Сіздер бейбіт күннің батырларысыздар. Сондықтан сіздер жауынгерлік тапсырмаларды жанқиярлықпен және абыроймен орындауларыңыз керек және қиын уақытта көмекке келуге әрқашан дайын болуға тиіссіздер. Осыған байланысты Ұлттық ұланның Бас қолбасшылығына, әсіресе, әскери қызметшілер үшін қолайлы жағдай жасау және жауынгерлік рухты арттыру бойынша ауқымды жұмыс атқарған Еркін Ботақановқа ерекше алғысымды білдіргім келеді, – деді ҚР Ішкі істер министрінің орынбасары Айдар Сайтбеков.

– 30 жыл бұрын мен Қазақстан Республикасының Ішкі әскерлерінің қолбасшылығын қабылдадым. Ол кезде бұл шағын эскадрилья болатын және ол Алматының маңындағы Бурундай әуежайында орналасқан. Иелігінде бір тікұшақ пен ұшақ қана болды. Ұшқыштар мен қызмет көрсетушілер үшін бірнеше вагондары болды. Ан-26 ұшағында тіпті ауыстырылатын экипаж болған жоқ. Менің өтінішім бойынша Мемлекет басшысы жеке құрам мен жүктерді тасымалдауға бейімделген Як-40 және Ан-30 ұшақтарын қосымша бөлді. Сол күндері біз ұйымдасқан қылмыспен белсенді күрестік. Біздің ұшу аппараттары шоғырланатын толық әуе базасы болса деген арманымыз болды. Міне, бүгінде біздің арманымыз орындалды. Ұлттық ұланның жеке құрамы біздің дәстүрлерімізді берік сақтайды деп үміттенемін. Сіздер барлық басқа әскери бөлімдерге үлгі болуларыңыз керек, – деді Болат Жанасаев.

– Ұлттық ұлан басшылығына алғысымды білдіргім келеді. Біз 2009-2014 жылдары елордалық жедел бригаданың құрылысын бастап, сәтті аяқтаған едік. Тағдыр бізді сол кезде құқық қорғау күштерімен біріктірді. Содан кейін, яғни 2015 жылы бізге әуе базасын салу туралы ұсыныс келіп түсті. Біз бұған қуана келістік. Сондай-ақ сенімді ақтап шықтық. Біздің компанияның атынан барлық әскери қызметшілер мен ардагерлерді құттықтаймын, – деп атап өтті Айк Согоян.

Содан кейін ҚР Ұлттық ұланының Ән-би ансамблі, Үлгілі-көрсетілімді оркестрі және елордалық жедел бригаданың Құрмет қарауыл ротасы ұсынған концерттік бағдарламада “Пилоты”, “О, далам”, “Пилот 12:45”, “Мен – ұшқышпын”, “Елдің қорғаны” сынды композициялар орындалды. Осыдан кейін шақырылған адамдар ұжымдық суретке түсіріп, әскери бөлімнің аумағымен танысты.

Қонақтарға әскери бөлімнің клубы, кітапхана көрсетілді, тарих және жауынгерлік даңқ бөлмесі бойынша экскурсия өткізілді. Жауынгерлік басқару пунктімен және оның ұшу қызметін басқаруды ұйымдастыру жөніндегі міндеттерімен таныстырылды. Содан кейін авиабазаның асханасында тамақтануды ұйымдастыру шарттары мен инженерлік-техникалық және ұшу құрамдарына міндеттелген нормалар көрсетілді. Ал спорт кешенінде қонақтар ойын спорт залын, сондай-ақ күрес және гимнастика бөлмелерін аралап шықты.

Ең бастысы қонақтар назарына авиациялық техникалар –Y8F200W ұшағы және Ми-171Е тікұшақтары ұсынылды. Сондай-ақ ұшу алаңында Ан-26, Ан-74 ТК-200, Ми-171Е және Ми-8 МТВ-2 секілді әуе кемелері тұрды.

Айта кетейік, авиациялық әскери бөлім құрылған сәттен бастап оның ұшқыштары 55 мыңнан астам адам және 7,5 миллион тоннадан астам жүк тасымалдаған. Сондай-ақ бітімгершілік миссия арқалаған қазақстандық жиынтық батальонды тәжік-ауған шекарасына көшіруге қатысты. Сонымен қатар олар Ақтөбе, Ақтау, Талдықорған, Тараз, Қызылорда және Алматы қалаларында арнайы және терроризмге қарсы операцияларға да тартылған.

Биыл ұшқыштар Батыс Қазақстан, Ақтөбе, Атырау, Қарағанды, Қостанай, Ақмола және Солтүстік Қазақстан облыстарында төтенше жағдайлардан зардап шеккендерге көмек көрсетті. Бұл ретте олар 300-ден астам тұрғынды эвакуациялап, 160 тонна гуманитарлық жүк жеткізген.

Ақпарат көзі: Министерство внутренних дел Республики Казахстан